Alqaly jıynǵa qatysýshylar elimizdegi barlyq mektepterdiń mańdaıshalaryna, olardyń tildik erekshelikterine qaramastan, Ybyraı atamyzdyń jastardy oqý men bilimge shaqyratyn «Kel, balalar, oqylyq!» degen úndeýin jazyp qoıý kerek. Muny bıyl uly aǵartýshynyń 180 jyldyq toıyna oraılastyryp, jumyla júzege asyrsaq ıgi degen bastama kóterdi.
Arqalyq pedagogıka ınstıtýty uıymdastyrǵan ǵylymı konferensııa uly aǵartýshynyń 180 jyldyǵyna oraı uıymdastyrylyp otyr. Ǵylymı jıyndy atalmysh joǵarǵy oqý ornynyń basshysy Seıitbek Qýanyshbaev ashty.
Konferensııada Y.Altynsarınniń aǵartýshylyq-pedagogıkalyq qyzmetiniń mańyzy men uly pedagogtyń jahandyq syn-qaterler men ózgerister dáýirindegi pedagogıkalyq ıdeıalarynyń búgingi kúnniń máselelerimen sabaqtastyǵy týraly tyń pikirler qozǵaldy, dedi ınstıtýt rektory.
Ǵylymı konferensııaǵa ybyraıtaný salasynda eńbektenip júrgen otandyq ǵalymdar men Túrkııa, Reseı ǵalymdary qatysty. ArqPI «Rýhanı jańǵyrý» jobalyq keńsesiniń dırektory Roman Aımaǵambetulynyń aıtýynsha, Elbasynyń «Rýhanı jańǵyrý» baǵdarlamasy men «Uly Dalanyń jeti qyry» atty baǵdarlamalyq maqalasynyń aıasynda búginde tarıhymyzǵa qaıta úńilip, talaı-talaı tarıhı muralarymyzdy zerdelep jatyrmyz. Qazirgi kezde Altynsarınniń qyzmeti men eńbegine ǵalymdar jańasha baǵa berýde. Konferensııa barysynda uly aǵartýshynyń pedagogıkalyq murasynyń jańashyldyǵy men tarıhı mańyzy týraly kóptegen ǵylymı topshylaýlar aıtyldy, dedi jobalyq keńse jetekshisi.
