Arheologtar tabylǵan zattar men turaqtardyń tas ǵasyry, qola jáne erte temir dáýiri, orta ǵasyrǵa jatatynyn málimdedi. Bul óz kezeginde osy jerdi mekendegen ejelgi órkenıet adamdarynyń turmys-tirshiligin jańa qyrynan zertteýge jol ashady dep habarlaıdy egemen.kz.
Oıyl aýdanynyń aýmaǵynda, Oıyl ózeniniń sol jaǵalaýyndaǵy Sambaı, Shóptikól, Aqshataý, Kóptoǵaı qorymdaryna júrgizilgen qazba jumystary kezinde b. z. II-IÚ ǵasyrlaryna jatatyn zattar tabylǵan. Bul jerdegi obalardan tabylǵan dúnıeler men jerleý ǵuryptary óte uqsas. Sonyń ishinde jerleý ǵurpy men tabylǵan dúnıelerdiń ár alýandyǵy jaǵynan Kóptoǵaı aýylynan 25 shaqyrym jerdegi «Shóptikól-I» qorymy erekshelenedi. Osy qorymnyń ońtústik-shyǵys bóligindegi er adam jerlengen obadan shirigen temir semser synyǵy, at ábzelderi tabylsa, al janyndaǵy áıel jerlengen obadan qysh ydystar, qola aına, túıreýish, tikpe aıylbas shyqty.
Al Yrǵyz aýdanynyń Sheńbertal aýyly mańyndaǵy ashylyp qalǵan oba týraly 2018 jyldyń jazynda osy aýyldyń turǵyny Sydyq Moldabekov oblystyq tarıhı-ólketaný mýzeıine habarlaǵan. Arheologtar Shetyrǵyz ben Yrǵyz ózenderiniń qosylatyn tusyndaǵy osy obadan tabylǵan pyshaq synyǵy, tas, temir qashaýlar, áıel áshekeıleri, qumyralar ejelgi jáne qola dáýiri men erte temir ǵasyryna tán turmystyq zattar degen qorytyndy jasady. Oıyl ózeniniń sol jaǵalaýynda, Qaratal aýylynan 2 shaqyrym jerdegi Qazdyaraldan da ejelgi adamdar turaǵy tabyldy.
Kóbine ózen arnalary jaǵalaýynan tabylǵan dúnıeler ejelgi adamdardyń turmys-tirshiligi, sharýashylyǵy men mádenıeti týraly jańa qyrynan zertteýge jol ashady deıdi Aqtóbe oblystyq tarıhı-ólketaný mýzeıiniń qyzmetkerleri. Bıyl arheologtar Oıyl, Mártók, Áıteke bı jáne Baıǵanın aýdandarynda zertteý jumystaryn jalǵastyrýdy josparlap otyr.
