Basym baǵyt – broılerge

– Qus fermasy zamanaýı tehnologııalarmen qaıta jabdyqtaldy. Byltyr munda 79 tonna qus eti óndirildi, – deıdi aýdan ákimi Qaırat Nurtaev.

Bul kooperatıv qolǵa alǵan jobany jergilikti eki kásipker qarjylandyryp otyr. Olar 2018 jyldan beri qus fabrıkasynyń jobasyna 300 mln teńge ınves­tısııa saldy. Al qus fermasy aýda­n ortalyǵynan bes shaqyrym qashyqtaǵy «Buıyrǵyn» atalatyn jerde ornalasqan. Bastapqyda munda jumysshylarǵa arnaıy jataqhana men ashana, 3 óndiris­tik nysan boı kóterdi. Keıin tór­tinshi nysannyń qurylysy jandandy.

– Qus jemin Ýfadan satyp alamyz. Qazir 500-600 gramm sal­maqtaǵy balapan ósirý jolǵa qoıyldy. Sondaı-aq, sal­maǵy 1,5 kılolyq taýyq pen 3,5 kılo bolatyn broıler etin óndirý­di jalǵastyrýdamyz, – deı­di «Bu­ıyr­ǵyn» óndiristik koope­ra­tı­vi­niń basshysy Gúlnar Omar­ǵa­lıeva.

Onyń aıtýynsha, kooperatıvte vahtalyq aýysymmen 40-tan astam jergilikti turǵyn jumys isteýge tartylyp otyr. Memleket tarapynan jobaǵa salynǵan ınves­tısııalyq qarjynyń 25 paıyzy kóleminde sýbsıdııa beriledi. Sondaı-aq, agrosektordy qarjy­landyrý júıesimen jyldyq ósimi 8 paıyz quraıtyn nesıe alypty. Joba quryltaıshylary óz qara­jaty esebinen gaz ben elektr je­lilerin júrgizip berdi.

Osyndaı jobanyń taǵy biri Ma­hambet aýdanynda iske qosy­lady degeli biraz jyldyń júzi aýdy. Aýdan ákiminiń orynba­sary Zulharnaı Muqashtyń máli­metinshe, bıyl osy jobany iske qosý kózdelip otyr.

– Aýdanda Indýstrııalandyrý kartasy aıasynda birneshe jobany iske qosý josparlandy. Sonyń ishinde bıyl júzege asatyn «Meken Chiken» JShS-nyń «Broı­lerlik qus etin óndirý ke­shenin salý» jobasy da bar. Jobanyń quny – 5,9 mlrd teńge. Bul joba iske qosylǵanda 79 adam jumyspen qamtylady. Al «Jumaǵalıeva» sharýa qojalyǵy jylyjaı jobasyn iske qosqaly otyr. Jylyjaı jobasynyń quny 1,2 mlrd teńgeni quraıdy. Jańa jylyjaıda 40 adam jumysqa tartylatyny kóz­delgen. Qazir jylyjaıdyń qurylysy bastaldy. Oǵan 16 gektar jer ýchaskesi bólindi, – deıdi Muqash Zulharnaı.

Onyń aıtýynsha, byltyr Mahambet aýdanynda Indýs­trııalandyrý kartasy aıasynda tórt joba iske qosylypty. Onyń úsheýi «Birinshi mamyr» JShS-na tıesili bolyp otyr. Bul serik­testikte sút óndirý zaýy­ty, bıogýmýs óndirý kesheni men sút óńdeý fermasyn keńeıtý joba­lary jumys isteı bastady. Son­daı-aq, «Saraıshyq ATSh» JShS eshki sútin óndirý fermasyn ashty. Atalǵan jobalarda ashylǵan jumys oryndaryna 125 adam tartyldy.

Atyraý oblysy