Onyń aıtýynsha, búgingi tańda Qazaqstanda gıdrometeorologııalyq monıtorıng 377 gıdrologııalyq bekette júrgizilýde.
«Dúnıejúzilik meteorologııalyq uıymnyń usynystaryna sáıkes el aýmaǵyndaǵy baqylaý jelisi búgingi jaǵdaıdan úlken bolýy tıis. Osyǵan baılanysty biz beketter sany boıynsha kórsetkishti 2025 jylǵa qaraı 550 birlikke deıin jetkizý úshin keshendi sharalar qabyldaý josparyn ázirledik», - dep atap ótti Qazgıdromet basshysynyń orynbasary.
Sonymen qatar, Serik Saırov aǵymdaǵy jyldyń 1 aqpanyndaǵy jaǵdaı boıynsha respýblıka ózenderiniń basseınderindegi gıdrometeorologııalyq jaǵdaı boıynsha aldyn ala derekterdi de atap ótti. Osylaısha, elimizdiń barlyq aýmaǵynda qar qorynyń kólemi kópjyldyq ortasha mánderden az ekeni atap ótildi.
«Qazaqstanda 8 ózen sý sharýashylyǵy basseıni bar. Olardyń árqaısysy boıynsha uqsas jaǵdaı qalyptasady – qar qorynyń kólemi normadan az alyndy. Bul jaǵdaılar aldaǵy jyly kóptegen ózender úshin sý az bolatyndyǵyn kórsetedi. Ásirese Almaty, Jambyl, Túrkistan, Qyzylorda, Aqtóbe, Atyraý jáne Batys Qazaqstan oblystarynda» - dedi spıker.
Sonymen qatar, Serik Saırovtyń aıtýynsha qazirgi ýaqytta gıdrologııalyq boljaýdyń qoldanystaǵy ádisterin jetildirý boıynsha sharalar qabyldanýda.
«Sý tasqyny kezinde ózen rejımin boljaý mańyzdy jáne kúrdeli mindet bolyp tabylady. Sondyqtan biz 2020 jyly basshylyqqa alatyn qujattardy, mysaly gıdrologııalyq boljamdardy jasaý erejelerin, Qazaqstan ózenderiniń kóktemgi sý tasqyny aǵynyn boljaý jónindegi nusqaýlyqty, jazyq ózenderdiń kóktemgi sý tasqyny aǵynynyń kólemin boljaý jónindegi ádistemelik jazbalardy ázirlep, jetildirdik. Ázirlengen ádistemeler sý resýrstary salasyndaǵy jetekshi ǵalymdar men mamandardyń oń pikirlerin aldy», - dep atap ótti ol.
Qazgıdromet baqylaý jelisiniń derekterin paıdalanýdan basqa, kóktemgi sý tasqyny kezeńindegi aǵyn kólemderin boljaý úshin aýa raıynyń ortasha-shuǵyl boljamdarynyń eýropalyq ortalyǵynyń spýtnıktik derekteri, swim jáne HBV-light sandyq modelderi de qoldanylady.
«2021-2022 jyldarǵa arnalǵan josparda – HBV 6.4 Shved modeliniń jańa nusqasyn Qazaqstannyń jaǵdaıyna beıimdeý», - dep habarlady Serik Saırov.
Qazgıdromet basshysynyń orynbasary elimizdiń shaǵyn ózenderiniń problemalaryn zertteý máselesi boıynsha kásiporyn qazirgi jaǵdaıdy egjeı-tegjeıli zertteý úshin Jem jáne Oıyl shaǵyn ózenderine ekspedısııalar josparlap otyrǵanyn atap ótti.
«21 aqpanda oqıǵa ornynda alǵashqy tekserý josparlanǵan, sodan keıin aýa-raıy jaqsarǵan soń, egjeı-tegjeıli taldaý júrgizý úshin osy ózenderge taǵy bir ekspedısııa uıymdastyrylady. Osyndaı tájirıbeni elimizdiń basqa da shaǵyn ózenderinde júzege asyrýdy josparlap otyrmyz», - dep túıindedi ol.
