Negizinen bıdaı óńdeý ónerkásibi jaqsy damyǵan Qostanaı oblysynda endi kúrish óńdep, kespe óndirýge den qoıǵan kásipkerler de tabylyp jatyr. Tobyl óńiri úshin tosyndaý kásipti qolǵa alyp jatqandardyń biri – Jitiqara qalasynyń turǵyny Elena Kııashko. Kásipker memlekettik baǵdarlamaǵa qatysyp, kúrish kespesin óndiretin seh ashý úshin 4 mln 355 myń teńge qaıtarymsyz grant qarjysyn utyp aldy.
Elena Kııashko byltyr oblystyq kásipkerler palatasy janyndaǵy «Bastaý» kýrsyn támamdap, sýshı-kafeterıı ǵımaratyn satyp alýǵa 6 paıyzdyq jeńildikpen qomaqty nesıe alǵan. Bıyl kásibin keńeıtý maqsatynda grantqa ótinish berip, memlekettik qoldaý qarjyǵa taǵy qol jetkizip otyr.
– Sýshıdi biraz ýaqyt úıde daıyndap júrdim. Keıin bir shaǵyn ǵımaratty jalǵa alyp, taǵamdy sol jerde daıyndap, tapsyrys berýshilerdiń úıine aparyp beretin boldym. О́ıtkeni dámhana ǵımaraty tar, nebári eki-aq oryndyq sııady. Osylaısha, birtindep tapsyrys kóbeıip, jalǵyz ózim úlgere almaı bara jatqan soń, kásibimdi keńeıtý jaǵyn oılastyra bastadym. Sodan aýdandyq kásipkerlikti qoldaý bólimindegi mamandardyń keńesimen «Bastaý» kýrsynda bilim aldym. Bıznes-jobamdy sátti qorǵap shyǵyp, 8,2 mln teńge jeńil nesıege qol jetkizip, úlken ǵımarat satyp aldym, – deıdi kásipker.
Bıznestiń qyr-syryn meńgerip, ónim sapaly ári qoljetimdi bolsa ǵana ótimdi bolatynyn ańǵara bastaǵan Elena Kııashko munymen toqtap qalmaı, kásibin odan ári keńeıtip, endi sýshı taǵamyna qajet shıkizatty ózi óndirip kórmekke bel baılaıdy. О́ıtkeni kúnde satyp alyp júrgen kúrish kespesiniń baǵasy ýdaı. Bul ónim baǵasyna áser etetindikten, keıde tapsyrys berýshiler de narazylyq tanytyp jatady. Osylaısha, kásipker memleket grantyna ekinshi ret ótinim berip, ózi kózdegen seh ashýǵa jetkilikti qarjyǵa qol jetkizip otyr.
Qomaqty qarjy qolyna tıgen soń qamyr ılegish, birneshe arnaıy ústel, tońazytqysh, kespe kesetin qurylǵy satyp alǵan kásipker qazir jeke sehyn iske qosýǵa daıyndap jatyr. Ǵımaratyn bastan-aıaq jóndeýden ótkizip, jumysshylar qabyldaýda.
– Kúrish kespesi óndirisiniń tehnologııasyn Ekaterınbýrg qalasynda úırendim. Bizdiń kespeler shetelden keletin ónimnen anaǵurlym arzan bolady. Munyń syrtynda, biz kúrish unyn ózimiz daıyndaımyz. Mundaı un qymbat turady. Ony ózimiz daıyndasaq, óndiriske ketetin shyǵyn da azaıady, – dedi isker áıel.
Kásipker kúrish kespesi óndirisin negizinen óz dámhanasynyń qajetin óteý úshin qolǵa alǵan. Alaıda ónim artylyp jatsa, qala dúkenderine de taratyp, satýdy josparlap otyr.
Qostanaı oblysy
