Alaıda, senatorlar el Prezıdentiniń memlekettik jáne jeke menshik operatorlardy qurýǵa tyıym salý týraly tapsyrmasyn basshylyqqa ala otyryp, jobalaý qujattary men ýran ken oryndaryn ıgerý taldaýyna táýelsiz saraptama operatoryn qurýǵa qatysty erejelerdi alyp tastaýdy usyndy.
«Ýran strategııalyq shıkizat bolyp tabylady jáne ony óndiretin qorlardy esepke alý elimizdiń otyn-energetıkalyq keshenin damytýdy belgileıdi. Engiziletin ózgerister men tolyqtyrýlar jer qoınaýyn paıdalanýshylardyń kelisimsharttaǵy mindettemelerdi oryndaý sapasyn arttyrýǵa jáne ýran óndirý jónindegi jobalaý qujattary týraly erejeni jetildirýge múmkindik beredi. Bul, saıyp kelgende, Qazaqstan álemde jetekshi oryn alatyn salany damytý jaǵdaıyn jaqsartýǵa múmkindik beredi», – dedi senator Erik Sultanov.
Senatorlar engizgen túzetý Parlament Májilisine jiberdi.
Sonymen qatar depýtattar búgin «Qazaqstan Respýblıkasynyń keıbir zańnamalyq aktilerine normashyǵarmashylyqty jetildirý máseleleri boıynsha ózgerister men tolyqtyrýlar engizý týraly» zańdy qarastyryp, eki oqylymda qabyldady.
Senat Tóraǵasy Máýlen Áshimbaevtyń aıtýynsha, normatıvtik quqyqtyq aktilerdi ázirleý, qoǵamdyq talqylaý jáne qabyldaý rásimderin jetildirý jónindegi mindetter Memleket basshysynyń saılaý aldyndaǵy baǵdarlamasynda belgilengen bolatyn. Bul zańnyń qabyldanýy halyqtyń zań shyǵarý prosesine belsendi qatysýyn qamtamasyz etý úshin qosymsha quqyqtyq negiz qalyptastyrady jáne Prezıdenttiń saılaý aldyndaǵy baǵdarlamasynyń oryndalýy bolyp tabylady.
«Ázirlenetin zańdardyń sapasyn arttyrýǵa, olar boıynsha júıeli túsindirý jumystaryn júrgizýge jáne qabyldanǵan zańdardyń oryndalýyn baqylaýǵa arnalǵan tetikter anyqtalady. Zań aıasyndaǵy ózgerister zańshyǵarýshylyq prosesti jańa deńgeıge kóterip, onyń ashyqtyǵyn jáne tıimdiligin arttyrýǵa óz úlesin qosady dep senemiz», – dedi Máýlen Áshimbaev.
Sondaı-aq, otyrysta Ahmet Baıtursynovtyń 150 jyldyǵyna oraı Premer-Mınıstrdiń atyna depýtattyq saýal joldandy. Onda Alash qaıratkeriniń mereıtoıyn laıyqty deńgeıde atap ótýge daıyndyq júrgizý qajettigi týraly aıtylǵan. Saýaldy «Ulttyq qundylyqtardy saqtaý jáne nyǵaıtý – táýelsiz memlekettiń jarqyn bolashaǵy» taqyryby boıynsha ótetin Parlamenttik tyńdaýǵa daıyndyq aıasynda Nurlan Ábdirov, Altynbek Nuhuly jáne basqa da birqatar senatorlar daıyndady.
