Jol kartada qalany damytýǵa jáne halyqtyń ál-aýqatyn arttyrýǵa baǵyttalǵan sharalar keshenin qamtydy. Qujat negizine 2025 jylǵa deıin on baǵyt boıynsha 149 is-sharany iske asyrý kiredi. Baǵdarlamany iske asyrýǵa jalpy 5 jylda 1,3 trln teńge qarjy qajet. Onyń ishinde memlekettik bıýdjetten – 694,5 mlrd. teńge, jeke ınvestorlardyń esebinen – 619,4 mlrd teńge.
Saılaýaldy baǵdarlamasy aıasynda 2021-2025 jyldary jylpy quny 1,36 trln. teńgeni quraıtyn 123 ınvestısııalyq joba iske asyrý kózdelýde. Budan bólek, bes jylda 3 mıllıonnan astam sharshy metr turǵyn úı qurylysy, 72 mektep qurylysy men 10 medısınalyq mekemeniń, 12 dárigerlik ambýlatorııalardyń qurylysy qarastyrylǵan.
Sonymen qatar sport ınfraqurylymyn damytý maqsatynda, 6 dene shynyqtyrý – saýyqtyrý kesheni salý men 6 strıt-vorkaýt jáne 73 sport alańdaryn ashý josparlanǵan.
Fraksııa otyrysyna qatysqan qala ákimi Murat Áıtenov saılaýaldy baǵdarlamany júzege asyrý arqyly qaladaǵy áleýmettik máselelerdi sheshýge bolatynyn jetkizdi.
«Partııa basshysy, Elbasy – Nursultan Ábishuly Nazarbaev halyqtyń jaǵdaıyn jaqsartý boıynsha bul joly da naqty isterdi atqarý úshin mindetterdi qoıyp otyr. Osy mindetterdi júzege asyrýda barlyǵymyz birlese eńbek etýimiz qajet. Bizge bosańsýǵa bolmaıdy, halyqtyń partııaǵa degen senimin saılaýaldy baǵdarlamada kórsetilgen 10 baǵytty sapaly ári ýaqtyly oryndap, júzege asyrý arqyly arttyrýymyz qajet. Týǵan qalamyz Shymkentti kórkeıtýge, tabysty etýge, munda qolaıly orta qalyptastyrýǵa kúsh salamyz», dedi qala ákimi.
Jıyn sońynda Nur Otan fraksııasynyń barlyq 23 múshesine partııanyń saılaýaldy baǵdarlamasyn iske asyrý jónindegi qalalyq Jol kartasynyń 149-tarmaǵyn oryndaý jáne baqylaý júkteldi.
