«Sıfrlyq Qazaqstan» memlekettik baǵdarlamasy sheńberinde 6 negizgi baǵyt boıynsha basym jobalar iske asyrylýda: bilim berý, densaýlyq saqtaý, qaýipsizdik, TKSh, kólik jáne memlekettik qyzmetter salalaryn sıfrlandyrý. Búgin elorda ákimi Sybaılas jemqorlyqqa qarsy is-qımyl agenttiginiń tóraǵasy Alık Shpekbaevqa jumys barysyn jáne onyń qoldanysyn tanystyrdy. Is-sharaǵa beınekonferensııa baılanysy arqyly birqatar mınıstrlikter, oblystyq ákimdikter jáne t.b. qatysty.
Altaı Kólginov atap ótkendeı, sıfrlyq tehnologııalardy engizý qyzmetterdiń sapasyn arttyrýǵa jáne qala turǵyndarynyń ómirin jeńildetýge ǵana emes, sonymen qatar sybaılas jemqorlyq táýekelderin birneshe ese azaıtýǵa, adamı faktordy boldyrmaýǵa múmkindik beredi.
«El basshylyǵy memlekettik qyzmetterdi sıfrlandyrý men avtomattandyrýǵa erekshe kóńil bóledi, osy baǵytta úlken jumys atqarýdamyz. Qazirdiń ózinde kóp nárse jasaldy. Mysaly, ótken jyly biz kórsetetin barlyq 159 memlekettik qyzmetti elektrondy formatqa kóshirdik. Bizge iQala ortalyǵynyń da kómegi zor. Onda turǵyn úı-kommýnaldyq sektory salasynda «bir tereze» qaǵıdaty boıynsha uıymdastyrý qyzmetterin alýǵa bolady. Buryn qyzmet kórsetý reglamenti bolmaǵan. Mysaly, páter satyp alǵannan keıin azamat barlyq monopolısterdi aralap, árqaısysymen jeke-jeke kelisimshart jasasyp, ara-tura qońyraý shalyp, qujattardyń daıyn ekenin bilýge májbúr bolatyn. Bul is 1 aıǵa deıin sozylatyn. Qazir ótinish berýshi iqala.kz saıty arqyly ótinish beredi, 3-5 kún ishinde oǵan qujattardyń daıyn ekendigi týraly SMS habarlama keledi. Osy jyldyń basynan beri ortalyq 14,5 myńǵa jýyq qyzmet kórsetti», deıdi elorda ákimi.
Sonymen qatar ol sybaılas jemqorlyqqa qarsy is-qımyl agenttiginiń «Astana – Adaldyq alańy» birlesken jobasy aıasynda mekteptegi tamaqtaný máselesi qolǵa alynǵanyn tilge tıek etti.
«Memlekettik satyp alýlardy avtomattandyrý júrgizilip, barlyq tórt aýdan ákimdigi front-ofıs formatyna kóshti. Ashyq ákimdik rejiminde jumys istep otyr. Sondaı-aq densaýlyq pasporttaryn 100% sıfrlandyrý júrgizildi. Medısınalyq anyqtama berýdiń zańdylyǵyn tekserý úshin aqparattyq qyzmet ázirlendi. Berilgen anyqtamaǵa QR-kod jazylady, kodty skanerlep, onyń túpnusqalyǵyn tekserýge bolady. Sondaı-aq, barlyq qoǵamdyq kólikter elektrondy tólem júıelerimen jabdyqtalǵan. Bul aqsha qarajatynyń 40%-yn kóleńkeli aınalymnan shyǵarýǵa múmkindik berdi. «Qaýipsiz aýla» jáne t.b. jobalarmen jumys isteýdi jalǵastyramyz», dedi Altaı Kólginov.
Budan basqa, qalada ınjenerlik jeliler men ǵımarattardy, jer ýchaskelerin sıfrlandyrý, bas jospardyń keńistiktik úsh ólshemdi maketin, qalanyń 3D modelin, ınvestısııalyq kartalardy jáne t.b. jasaý boıynsha jumystar júrgizilýde.
Mysaly, ınjenerlik jelilerdi sıfrlandyrý birneshe máseleni birden sheshýge múmkindik beredi. 3D jáne BIM tehnologııalaryn qoldana otyryp, jelidegi júktemelerdi kórýge, ıaǵnı qaı jerin aýystyrý kerek, qýatty qaı tusta arttyrý kerek sekildi máselelerdiń aldyn alýǵa bolady. Sondaı-aq, sıfrlyq jobalardy iske asyrý qala qurylysy prosesterin, aýrýhanalardy, mektepterdi, balabaqshalardy belgili bir aýdandardy qamtamasyz etý qajettiligi týraly derekterdi boljaýǵa jáne modeldeýge, qoldanystaǵy jáne jobalanatyn jol jelileriniń jaı-kúıin kórýge múmkindik beredi.
Sıfrlandyrý sol sııaqty bos jer ýchaskelerin utymdy paıdalanýǵa, paıdalanylmaıtyn ýchaskelerdi qaıtarý boıynsha baza qurýǵa múmkindik beredi.
Alık Shpekbaev Nur-Sultan ákimdiginiń qoǵam ómiriniń mańyzdy baǵyttaryn sıfrlandyrý, memlekettik qyzmetterdi elektrondyq formatqa kóshirý, yntymaqtastyq jáne «Astana – Adaldyq alańy» jobalyq keńsesimen birlesken jumystardy joǵary baǵalady.
«Elordanyń tájirıbesin ózge óńirler de qoldanýy tıis. Qazir elimiz boıynsha jer qatynastary jáne qurylys salalarynda úlken problemalar kezdesip jatady. Búgin Nur-Sultanda geoportal arqyly oryn alǵan sybaılas jemqorlyq táýekelderin, adamı faktordy boldyrmaýǵa múmkindik beretin erekshe sheshimder men tásilderge kýá boldym. Barlyq ákimdikter osy tájirıbeni negizge alýy kerek. Elordada qabyldanǵan, qazirdiń ózinde tıimdiligin kórsetip otyrǵan standarttardy basqa memlekettik organdar qabyldaýy qajet», dep túıindedi Antıkor basshysy.
