Mınıstr alǵashqy kúni óńir basshysy Ǵalı Esqalıevpen birge «Oralagroremmash» zaýytyndaǵy órt sóndirgish avtomobıl tehnıkasyn shyǵaratyn sehty aralap kórip, osynda jasalatyn avtosısternalar, syıymdy-quıý tehnıkasy, órt sóndirý tehnıkasy, tez turǵyzylatyn ǵımarattarǵa arnalǵan metall konstrýksııalarymen tanysty.
Budan keıin Batys Qazaqstan oblysy Tótenshe jaǵdaılar departamentiniń daǵdarys ortalyǵynda jedel jaǵdaı jáne sý tasqyny kezeńine daıyndyq máseleleri boıynsha oblys aýmaǵynda ornalasqan TJD aýmaqtyq bólimshelerimen keńes ótkizildi.
Jumys saparynyń ekinshi kúni mınıstr Aqsaı qalasyndaǵy modýldik órt sóndirý bóliminiń qurylysyn tekserdi. Sondaı-aq Batys Qazaqstan oblysy ákiminiń orynbasary Muhtar Mankeevpen birge óńirdiń birneshe eldimekenderin aralady. Atalǵan eldimekenderdiń aýmaǵynda órt qaýipsizdigi salasyn damytý úshin órt depolaryn salý jáne jóndeý jumystaryn júrgizý qajettiligi bar. Osy máselelerge qatysty jergilikti atqarýshy memlekettik organdarǵa birqatar naqty tapsyrma berildi.
Bórli aýdany tehnogendik sıpattaǵy seısmıkalyq qaýipti aýmaq sanalady. Sondyqtan aýmaqta bolýy múmkin aýqymdy tehnogendik tótenshe jaǵdaılarǵa den qoıý jáne onyń saldaryn joıý boıynsha basqarý organdary, azamattyq qorǵaý avarııalyq-qutqarý qyzmetteri beıqam bolmaýy kerek. Osy saparda Iýrıı Ilın jáne Halyqaralyq Azamattyq qorǵanys uıymynyń ókilderi «Qazavıaqutqarý» TJM avıasııalyq bólimshesiniń MI-8 tikushaǵymen Respýblıkalyq jedel-qutqarý jasaǵynyń qutqarýshylarynyń oqý-jattyǵýyn baqylady. Jattyǵý barysynda arnaıy qurylǵylarmen qutqarýshylar men zardap shekkenderdi túsirý jáne qabyldaý jáne TJ boljanatyn aýdannan zardap shekkenderdi evakýasııalaý boıynsha tásilder pysyqtaldy.
Budan keıin Iýrıı Ilınniń tóraǵalyǵymen ótken jumys keńesine Batys Qazaqstan oblysy ákiminiń orynbasary Muhtar Mankeev, Batys Qazaqstan oblysy TJD bastyǵy Jasulan Jumashev, Halyqaralyq Azamattyq qorǵanys uıymy Bas hatshysynyń orynbasary Andreı Kýdınov, HAQU halyqaralyq departamentiniń dırektory Saltanat Tashmatova, HAQU Ortalyq Azııa óńiri elderindegi ókili Januzaq Tokýshev jáne oblys aýmaǵynda jumys isteıtin iri sheteldik munaı-gaz kompanııalarynyń basshylary qatysty.
Keńes barysynda Qazaqstannyń batysynda – munaı-gaz salasynyń áleýetti-qaýipti nysandary shoǵyrlanǵan jerinde Halyqaralyq Azamattyq qorǵanys uıymymen birlesip halyqaralyq óńirlik trenıng-ortalyǵyn qurý sekildi birqatar ózekti másele qaraldy.
Halyqaralyq Azamattyq qorǵanys uıymynyń quramynda qazirgi tańda 59 el múshe bolsa, 16 memleket baqylaýshy statýsynda eken. Uıymnyń maqsaty apat kezinde halyqty qorǵaý men kómek kórsetý, sondaı-aq dúleı jáne antropogendik apattar jaǵdaıynda múlik pen qorshaǵan ortany qorǵaýdy qamtamasyz etetin qurylymdar qurýǵa járdemdesý. Uıymǵa qatysýshy elderdiń azamattyq qorǵanys qyzmetteri birige qımyldap, turǵyndar úshin oqý jáne aqparattyq baǵdarlamalardy ázirleıdi.
- Eki kúndik saparynyń qorytyndysynda mınıstr Iýrıı Ilın tótenshe jaǵdaılar boıynsha halyqaralyq óńirlik trenıng-ortalyǵyn qurýdyń mańyzdylyǵyn erekshe atap ótti, deıdi Batys Qazaqstan oblystyq Tótenshe jaǵdaılar departamentiniń baspasóz hatshysy Bákızat Maǵzenova.
