Oblys ákimi Ońdasyn Orazalın, máslıhat depýtattary, úkimettik emes uıymdardyń ókilderi, sportshylar jáne táýelsizdik alǵan jyldary dúnıege kelgen jastar qatysqan shara barysynda kópbalaly jáne az qamtylǵan birneshe otbasyǵa qaıyrymdylyq kómegi kórsetildi. Eń aldymen bul jerde múmkindigi shekteýli 15 aqtóbelik turǵynǵa Aqtóbe qalasynyń irgesindegi «Shıpager» saýyqtyrý ortalyǵynda emdelýge joldama berildi. Sondaı-aq aqtóbelik volonterlerdiń bastamasymen qıyn jaǵdaıǵa tap bolǵan bir otbasyǵa roller boıynda 400 myń teńge jınalyp, sertıfıkaty tabystaldy. Atalǵan qarajat osy otbasynyń baspanaly bolýy úshin bastapqy jarna retinde tólenedi.
Qaıyrymdylyq sharalary aıaqtalǵan soń oblystyq máslıhat depýtattary, sportshylar men volonter jastar shańǵy jarysyn ótkizdi. Aqtóbede eki kún boıy jaýǵan qalyń qar 3 shaqyrymǵa sozylatyn roller boıyn toltyryp, qysqy sport túrlerimen shuǵyldanatyn áýesqoı sportshylardyń Kirpishti eldi mekenine aǵylýyna sebepshi boldy. Bul bıylǵy qysta eń kóp jaýǵan qar.
