Sýrette: ortada (soldan ońǵa qaraı) oblys sportynyń basshysy Temirhan Abylaev pen UOK sport dıreksııasynyń dırektory Elsııar Qanaǵatov.
Bul máselede Qaraǵandy oblystyq dene shynyqtyrý jáne sport basqarmasynyń basshylyǵy batyl qadamdarǵa, tyń sheshimderge bara bildi. Mysaly, óńirde jarystar, oqý-jattyǵý jıyndary jáne basqa da is-sharalar jańa pishimde qashyqtan, onlaın rejimde júrgizile bastady.
«Byltyr Táýelsizdigimizdiń 30 jyldyǵyna arnalǵan Saryarqa onlaın spartakıadasy alǵash ret ótkizildi, deıdi oblystyq dene shynyqtyrý jáne sport basqarmasynyń basshysy Temirhan Abylaev. – Sporttyń toǵyz túrinen qalalar men aýdandar arasynda ótken jarysqa bes myńǵa jýyq adam qatysty. Bul Qazaqstanda qashyqtyq rejiminde uıymdastyrylǵan jarystar arasyndaǵy úzdigi boldy. Jalpy, karantındik shekteýler kezinde barlyq sanıtarlyq normalar men erejelerdi saqtaı otyryp, onlaın-formatta 371 sporttyq týrnır ótip, oǵan 18 564 adam qatysty».
Sonymen qatar jergilikti Saryarqa telearnasymen birlesip «Gımnastıka» jobasy júzege asyryldy. Baǵdarlama aıasynda Jansaı Smaǵulov, Beıimbet Kanjanov, apaly-sińlili Nemıchter, Mılana Safronova jáne basqa jetekshi sportshylardyń qatysýymen áleýmettik jelilerde tikeleı efırler uıymdastyryldy. Sondaı-aq byltyrǵy qazan aıynda sıfrly tehnologııalardyń kómegimen «QARAGANDY MARATHON 2020» halyqaralyq onlaın marafony da uıymdastyryldy.
Jalpy, qazirgi tańda Qaraǵandy oblysynda balalar-jasóspirimder 109 klýby, jasóspirimderdiń 22 dene shynyqtyrý klýby, jalpy bilim beretin mektepterde 2 337 sport úıirmesi, kolledjderde 431 seksııa, joǵary oqý oryndarynda 126 sport úıirmesi jumys isteıdi. Al óńirdegi 45 sport mektebinde 32 896 bala men jasóspirim tegin jattyǵady.
Aıta ketetin bir jaıt, bıyldan bastap qalalar men aýdandarda ornalasqan 17 mamandandyrylmaǵan balalar-jasóspirimder sport mektebi oblystyq deńgeıge berildi. Jalpy alǵanda, óńirdegi sport úıirmelerine qatysatyn balalar men jasóspirimder sany 146 015 adamǵa jetti.
Búginde Qaraǵandy oblysynyń jetekshi sportshylarynyń aldynda zor maqsat bar. Kózdegen basty nysana – Tokıo Olımpıadasy. Qazirdiń ózinde bul dodaǵa qatysý joldamasyna boksshy Abylaıhan Júsipov, áıelder kúresinen Elmıra Syzdyqova, sonymen birge mánerlep júzýshi apaly-sińlili Aleksandra men Ekaterına Nemıchter ıe bolǵan.
Aıta ketý kerek, Tokıoǵa aparatyn joldama sany budan da kóp bolýy múmkin degen úmit bar. Qazirgi tańda oblystyń 11 úzdik sportshysynyń sporttyń jeti túri boıynsha lısenzııa alýǵa múmkindigi bar. Olardyń qatarynda dzıýdoshylar Islam Bozbaev, Jansaı Smaǵulov, grek-rım kúresiniń sheberi Erulan Ysqaqov, batýtta sekirýshi Danıl Musabaev, akademııalyq eskek esýshiler Svetlana Germanovıch, Vıtalıı Vasılev, Mıhaıl Taskın, baıdarka men kanoeda eskek esýshiler Darıa Razýmovıch, jeńil atletshiler Rıma Kashafýtdınova, Davıd Efremov jáne ústel tennısshisi Zaýresh Aqasheva bar.
Paralımpııa oıyndaryna beriletin kvota úshin kúreste óńirdiń múmkindigi shekteýli sportshylarynyń da kórsetkishi jaman emes. Mysaly, búginde júzýden Natalıa Zvıagınseva, Andreı Afanasev, Álııa Rahymbekova, myltyq atýdan Aıdos Jylqyshınov jáne jeńil atletshi Dastan Muqashbekov joldamaǵa ıe bolyp, tórt jylda bir ótetin dodaǵa alańsyz daıyndalyp júr.
Oblysta jetekshi sportshylarǵa, ıaǵnı Ulttyq qurama komandalar sapynda júrgen atletterge buryn bolmaǵan jaǵdaılar jasala bastaǵanyn aıta ketken jón. Bul týrasynda óńir sportynyń basshysy Temirhan Abylaev bylaı deıdi: «Oblys basshylyǵy jetekshi sportshylardy qoldap, olardyń jańa jeńisteri úshin barlyq jaǵdaı jasaýda. Mysaly, 2020 jyly chempıondarǵa shákirtaqyny eki-úsh ese kóbeıtý týraly sheshim qabyldandy. Shákirtaqy alýshy sportshylar sany 104-ten 165 adamǵa deıin kóbeıdi».
Pandemııa saldarynan týyndaǵan kúrdeli kezeńge qaramastan, oblysta sport nysandaryn salý jumystary saıabyrlamady. Búgingi kúnde olardyń qurylysy bıýdjettik jáne bıýdjetten tys qarajat esebinen júrgizilýde. Mysaly, byltyr memleket esebinen Qarqaraly qalasynda 320 oryndyq dene shynyqtyrý-saýyqtyrý kesheni (DShSK) paıdalanýǵa berildi. Sondaı-aq demeýshiler esebinen Temirtaýda dál sondaı keshen salynyp, padalanýǵa berildi. Jalpy, oblys boıynsha sport nysandaryn salý jáne jóndeý jumystaryna 11 mlrd teńgeden astam qarjy bólingen.
Oblys ortalyǵynyń óz basynda respýblıkalyq federasııalardyń qarajatyna halyqaralyq talaptarǵa tolyq jaýap beretin Saryarqa ústel tennısi ortalyǵy men «Tennıs» ortalyǵy salyndy. Byltyr Qaraǵandy oblysyna jumys saparymen kelgen Memleket basshysy Qasym-Jomart Toqaevtyń ózi bul tennıs nysandaryna óte joǵary baǵa berdi.
Jalpy, memlekettik baǵdarlamalardyń óńirdegi sport ınfraqurylymyn damytýǵa oń áserin tıgizip jatqanyn aıta ketken lázim. Qazirdiń ózinde «Jumyspen qamtýdyń jol kartasy» boıynsha óńirdegi 6 birdeı sport nysanynyń qurylysyna qarajat jetkilikti mólsherde bólingen. Olardyń qatarynda Shahtınsk qalasyndaǵy 160 adamdyq basseıni bar DShSK, Jezqazǵandaǵy 320 adamdyq basseıni bar DShSK, Ulytaý aýdanyna qarasty Qarsaqbaı aýylyndaǵy 100 adamdyq DShSK, Jezdi kentindegi 160 adamdyq DShSK, Jańaarqa aýdanynyń Atasý kentindegi basseın jáne Nura aýdanynyń Nura aýylyndaǵy basseın bar.
Oblys sportynyń basshysy Temirhan Abylaev halyqty sportqa jumyldyrýǵa áser etetin mańyzdy faktorlardyń biri – sporttyq ınfraqurylymnyń damýy men onyń qoljetimdiligi ekenin basa ataıdy. «Búginde, deıdi ol, – Qaraǵandy oblysynda 3155 sport nysany jumys isteıdi, onyń ishinde 1230-y aýyldyq jerlerde ornalasqan. Qalalar men aýdandarda jyl saıyn hokkeı jáne sport alańdary ashylady. Búginde oblysta jasandy jabyndysy bar 333 sport alańy, 262 kóp salaly hokkeı korty jáne 34 strıt-vorkaýt alańy bar».
Bul baǵyttaǵy jumystardyń jemisti bolýyna «Jumyspen qamtýdyń jol kartasy» baǵdarlamasynyń ıgi yqpal etkenin atpaı ketýge bolmaıdy. Mysaly, ótken jyly atalǵan memlekettik baǵdarlamany júzege asyrý aıasynda 14 jobaǵa 1 mıllıard teńgege jýyq qarajat bólingen.
Budan bólek búginde «Aýyl – el besigi» memlekettik baǵdarlamasy aıasynda Buqar jyraý aýdanynyń Botaqara kentinde 320 oryndyq sport kesheniniń qurylysy júrgizilýde. Bıýdjetten tys qarajat esebinen Qaraǵandy qalasynda sporttyq-saýyqtyrý kesheni men trıatlon parki salynýda.
Oblys sportynyń basshysy Temirhan Abylaev árbir qala men aýyldyq jerlerde turatyn balalardyń, jastar men eresek adamdardyń sportpen shuǵyldanýyna jaǵdaı jasaýdy basty maqsat sanaıdy. «Memleket basshysy byltyrǵy Joldaýynda óskeleń urpaqtyń sporttyq, shyǵarmashylyq áleýetine erekshe nazar aýdarý qajettigin atap ótti. Bizdiń basqarma jańa jaǵdaıda osy baǵytta belsendi jumys istep keledi. Qazirgi ýaqytta sportshylardyń jattyǵýyna ruqsat etildi, barlyq qajetti sanıtarlyq normalardy saqtaı otyryp, sport keshenderi men basseınder jumys isteı bastady. Oblystyq jáne aýdandyq jarystardy ótkizýge áli de bolsa ruqsat berilgen joq, biraq olar mindetti túrde onlaın rejimde jalǵasady. 2021 jylǵa elýge jýyq aýqymdy sporttyq is-sharalar josparlanǵan, oǵan ártúrli jastaǵy oblys turǵyndary qashyqtan qatysa alady», deıdi óńirdiń sport basshysy.
QARAǴANDY
