Máselen, Jánibek aýdandyq bas memlekettik sanıtarlyq dárigerdiń qaýlysymen 2021 jylǵy 19 aqpan men 5 naýryz aralyǵynda Jánibek aýylynda senbi-jeksenbi kúnderi barlyq bazar, saýda úıleri men azyq-túliktik emes dúkender jabylady. 9-11- synyp oqýshylarynan basqalary qashyqtan oqıdy. Memlekettik organdar men kvazımemlekettik sektor uıymdary qyzmetkerleri ujymdaǵy adam sanyna baılanysty keminde 80, 50, 30%-yn onlaın rejimge aýystyrady.
Dál osyndaı shekteýler Shyńǵyrlaý aýdanynda da engizildi. Joǵarydaǵy talaptarǵa qosa, munda dinı nysandardaǵy barlyq buqaralyq is-sharalar, fıtnes, jattyǵý zaldarynyń jumysy toqtatyldy.
Oblystyq densaýlyq basqarmasy basshysynyń mindetin atqarýshy Arman Qalıbekovtiń aıtýyna qaraǵanda, oblys «sary aımaqta» tur. Búginge deıin óńirde 12 473 adam indetti juqtyrsa, 10 031 adam jazylyp shyqqan. О́kinishke qaraı, 199 adam koronavırýstyq ınfeksııadan kóz jumǵan. Sońǵy derekter boıynsha 195 tósektik orynǵa arnalǵan 4 karantındik stasıonarda 19 naýqas jatyr. Al 591 tósektik oryn 7 ınfeksııalyq stasıonarda 312 adam emdelýde. Aýrýhanalar tolymdylyǵy 52,7%-dy quraıdy. Infeksııalyq stasıonarlardaǵy 62 reanımasııalyq tósektik orynda 18 naýqas emdelýde. Aýrýhanalardyń teń jarymy bos. Ádettegideı, jansaqtaý bóliminde jatqan naýqastardyń 61 paıyzy – jasy 60-tan asqan egde jandar. Olardyń ishinde 13 naýqastyń burynnan ilespeli aýrýy bar eken. Dárigerler qazirgi tańda ókpeni jasandy jeldetý apparatyna – 4 naýqas, ottegi konsentratoryna – 11 naýqas, ortalyqtandyrylǵan ottegi kózine – 98 naýqas qosylǵanyn habarlady.
Pandemııa kúrt kúsheıgen jaǵdaıda qamsyz bolmaý úshin oblysta qosymsha 1 986 tósektik oryn rezervtik qor daıyndalǵan bolatyn. Onyń 1 221 tósektik oryn – ınfeksııalyq stasıonarlarda, 765 tósektik oryn karantındik stasıonarlarda ornalasqan.
Oral qalasyndaǵy ár emhanada COVID-19 jáne pnevmonııa sımptomdary bar pasıentterdi, sozylmaly aýrýlary bar adamdardy, sondaı-aq kórsetkishter boıynsha júkti áıelder men balalardy úıde baqylaý úshin 124 mobıldi brıgada jumys isteýde. Mobıldi brıgada táýligine orta eseppen 350 márte shaqyrýǵa barady, onyń ishinde 65-i – COVID-19 boıynsha qońyraý eken.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaev 1 aqpannan beri COVID-19 juqtyrǵan 1 354 jaǵdaı anyqtalǵanyn habarlady. Naýqastarmen qarym-qatynasta bolǵan 1 990 adam medısınalyq baqylaýǵa alynǵan.
– Sońǵy aptada ótken aptamen salystyrǵanda aýrýshańdyq 15,7%-ǵa tómendedi, – deıdi Muhamǵalı Qaıyrjanuly.
Saraptamaǵa qarasaq, naýqastardyń 31,9%-y – jumys isteıtin adamdar. Degenmen aýrý juqtyrǵandar arasynda zeınetkerler men jumyssyzdar da az emes, tıisinshe 26,8% (364 adam) jáne 23,1% (313 adam) bolyp tur. Oqý jyly bastalǵaly COVID-19 mektepte dástúrli formatta oqıtyn – 212, qashyqtan oqıtyn – 209, barlyǵy 421 oqýshyda anyqtalǵan. Al 11 qańtarda bastalǵan úshinshi toqsanda 207 oqýshy vırýs juqtyrǵan. Onyń 114-i – dástúrli formatta, 93-i qashyqtan oqıdy eken. 12-18 aqpan aralyǵynda Oral qalalyq jáne tıisti aýdandardyń bas memlekettik sanıtarlyq dárigerleri qaýlysymen 4 mektep karantınge jabylǵan.
Oblystyń bas sanıtar dárigeriniń aıtýynsha, salynǵan tyıymdardy buzyp, kópshilik sharalar ótkizetin, basqa da talaptardy buzatyn mekeme-uıymdar, jekelegen adamdar azaımaı otyr. Arnaıy qurylǵan monıtorıngtik toptar 1 qańtardan beri óńirde 916 márte reıd júrgizgen. Osylaısha 7 925 nysan tekserilgen kezde, 25 nysanda buzýshylyqtar anyqtalǵan. Buǵan baılanysty 79 hattama toltyrylyp, jalpy kólemi 5 090 165 teńge aıyppul salyndy.
Batys Qazaqstan oblysy
