Kórme Ulttyq mýzeıde uıymdastyryldy. Maqsat – sýretshiniń taýandy tarıh pen mádenıet taqyryptaryna arnalǵan shyǵarmalaryn ónersúıer qaýymǵa keńinen nasıhattaý.
Saltanatty sharanyń betashar sózin Ulttyq mýzeı dırektory Arystanbek Muhamedıuly sóıledi.
«Tóleýbek Tóleýuly ómir boıy izdeniste júretin, ómirge de, ónerge de shyn ǵashyq jan. Sebebi realıst sýretshi bar álem tek tańǵajaıyptan turady dep ómir súredi. Buǵan sýretshiniń qylqalamynan shyqqan peızajdyq týyndylary aıqyn dálel. Kórmeniń «Balalyq shaqqa saıahat» atalýy da beker emes. Tóleýbek Muqashevtiń bala kezinen bastaý alǵan shyǵarmalarynan jan dúnıesiniń tazalyǵyn, eli men jerine degen sheksiz súıispenshiligin baıqaýǵa bolady», dedi A.Muhamedıuly.
Peızaj qylqalam sheberiniń janyna jaqyn janr. Sýretshi úshin tumsa tabıǵat qashanda sulýlyq pen tazalyqtyń máńgilik úılesim tapqan nurly mekeni. Týǵan jer onyń barlyq shyǵarmalarynyń ózegi dese de bolady. Ekspozısııaǵa usynylǵan 50-ge jýyq kartınada Jetisý jerine tán ádemi peızajdy, qyzǵaldaǵy jaınaǵan darhan dalany, tynyshtyqqa bókken tabıǵat tylsymyn shynaıy jetkizgen. Sonysymen oqyrmandardy ózine elitip alady. Árbir týyndy balaǵa ertegi aıtyp otyrǵan ájedeı alańsyz jyldardyń kórkem kórinisin kóz aldyna ákeledi.
Shara barysynda belgili qoǵam jáne memleket qaıratkeri Birǵanym Áıtimova: «Bul ózi erekshe kórme. Sebebi Tóleýbek Tóleýuly – Qazaqstanda memlekettik qyzmetimen qatar, ónerin de damytyp, kópshilikke usynǵan birinshi senator. Búgingi kórme onyń týǵan jerine degen alǵysy, súıispenshiligi, mahabbaty», dep aqjarma tilegin joldasa, senator Baqytjan Jumaǵulov pen memleket qaıratkeri Jaqsybek Qulekeev sýretshi týyndylarynyń keleshek urpaq úshin taýsylmas rýhanı azyq bolatyndyǵyn atap ótti.
Kenep betine túsken san túrli boıaýlar bala qııalyna bitken alýan áserler. Sol aıaýly shaqtar sana túbinde qattalyp, san jyldan keıin tamasha týyndylarǵa aınalǵan. Mundaǵy kartınalardyń qupııasy sonda. Avtordyń kindik qany tamǵan topyraǵyna degen saǵynyshy sýretke ulasyp, tústerge ár berip tur.
Aıta keteıik, qylqalam sheberiniń týyndylaryn tamashalaımyn degen kópshilik úshin kórme eki aı boıy Ulttyq mýzeıde ekspozısııalanady.
