Búgin apat ornyna oblys ákimi Qumar Aqsaqalov baryp, bolǵan jaıdy óz kózimen kórdi. Jýrnalısterge bergen brıfınginde ol qaza bolǵandardyń otbasyna kóńil aıtty jáne aýrýhanada jatqandardyń tezirek saýyǵyp ketýine tilektes ekendigin jetkizdi. Ákim óziniń oıyn bylaı qorytty: «Mundaı apatqa endi jol bermes úshin men kópqabatty úılerde kásip ashqan barlyq kásipkerlerge ǵımaratqa gaz balondaryn ákelýge, qoldanýǵa qatań tıym salamyn. Bul talapty jedel oryndaý úshin quqyq qorǵaý organdarynyń, prokýratýranyń, TJ uıymynyń, qalalyq ákimdik pen «Atameken» kásipkerler palatasynyń, qoǵam ókilderiniń qatysýymen komıssııa qurylyp, barlyq shaǵyn kásiporyndar tekseriletin bolady», dedi. Sonymen qatar ákim úıdi qalpyna keltirýge qalalyq ákimdikten qarajat bólinetindigin aıtty. «Osyndaǵy bólmelerdiń ıelerine bir rettik materıaldyq kómek beriletin bolady. Birde bir adam nazardan tys qalmaıdy», dedi ol.
Osydan keıin óńirlik kommýnıkasııalar qyzmetiniń alańynda TJ saldary jáne zardap shekkenderge kómek kórsetý boıynsha qabyldanyp jatqan sharalar týraly TJ departamentiniń bastyǵy Ramıl Kamalov pen qala ákimi Bolat Jumabekov baspasóz máslıhatyn ótkizdi.
Úıdiń tolyq meken-jaıy Internasıonal kóshesindegi 21 úı. Bul qalanyń qaq ortasynda ornalasqan ǵımarat, buryn ol «Kırov atyndaǵy zaýyttyń» jataqhanasy bolǵan. Keıin turǵyndar jekeshelendirip alǵan eken. Úıdiń eki kireberisi bar. Barlyq bólmeler sany 109. Jataqhana 1971 jyly paıdalanýǵa berilgen. Bólmelerdiń arasy kirpishpen bólingen, al tóbesi beton plıtalardan turady. Munda gaz engizilmegen, turǵyndar as-sýlaryn elektr plıtalarynda daıyndaıdy.
Al úıdiń birinshi qabaty túrli kásiporyndarǵa jalǵa berilgen. Sonyń ishinde «Qara jorǵa» men «Hochý shashlyka» atty eki kafe bolǵan. TJ departamentiniń bastyǵy R.Kamalovtyń aıtýyna qaraǵanda jarylystyń epısentri «Qara jorǵa» kafesi bolǵan. Gaz balony osy jerde jarylǵany anyqtalǵan. Bul Qytaıdan oralǵan qandasymyz ashqan kafe edi. Jigittiń ózi oqıǵa ornynda qaza boldy. Onymen irgeles «Hochý shashlyka» kafesi men «Versal» atty shashtraz bolǵan. Jarylystan ortaq qabyrǵa qulap, jalyndaǵan órt barlyq kireberistegi páterlerdi sharpyǵan. Aldymen ekinshi qabattaǵy №22 jáne №24 bólmelerge jetken. Birinshi kireberis órt qushaǵynda qalyp, tóbesi qulap, úıge kirýge múmkindik bermegen. О́rtsóndirýshilerdiń alǵashqy mashınasy oqıǵa ornyna kúndizgi saǵat tórtte jetken. Olardyń boljaýynsha órt sharpyǵan aımaqtyń kólemi 110 sharshy metr. О́rt sóndirý tórt ýchaske arqyly júrgizilgen. Oǵan barlyǵy 83 adam men TJ departamentiniń 17 tehnıkasy qatystyrylǵan.
TJ qyzmetkerleriniń kómegimen 120 adam evakýasııalanǵan. Onyń 57 sol mańdaǵy №2 orta mektepke engizilgen. Solardyń ishinde 10 adam Soltústik Qazaqstan ýnıversıtetiniń jataqhanasyna ornalasýdy jón kórgen. Ol da sol mańda ornalasqan. Al 63 adam ózderiniń týystarynyń úıine barýdy qalaǵan. Mektep pen ýnıversıtettiń jataqhanasyna ornalastyrylǵandarǵa ystyq tamaq uıymdastyrylǵan.
Japa shekken 16 adam aýrýhanalarǵa jetkizilgen, sonyń ishinde 1996 jyly týǵan qandasymyz mert bolǵanyn aıttyq. Ol kásipkerlikpen aınalysyp, osy kafeni ashqan eken. Úılengen, artynda áıeli men jas balasy balasy qaldy.
Al artynan, qulaǵan úıindilerdiń astynan 1999 jyly týǵan jas áıeldiń denesi tabylǵan. Aýrýhanalarǵa jetkizilgenderdiń bári de 30-40 jastar arasyndaǵy jas azamattar. Ekeýi jas bala. Ýly gazǵa tunshyǵyp, jaraqat alǵan 2020 jyly týǵan qyz balany ata-anasy aýrýhanaǵa jatqyzýdan bas tartyp, úıine áketken. Aýrýhanadaǵy adamdardyń 15 jaralanǵan, sonyń 7 alǵashqy kómek alǵan soń týystary ornalastyrylǵan jerge qaıtty.
О́rt keshki altydan asa sóndirilip, tolyqtaı keshki segiz kezinde tunshyqtyryldy. Aýanyń temperatýrasy 20-22 gradýs sýyq shamasynda boldy. Polısııa órt mańyn tolyq qorshap, basqa adamdardyń barýyn, órt sóndirýshilerge kedergi keltirmeýin qamtamasyz etti.
Soltústik Qazaqstan oblysy
