Mańǵystaý oblysynyń Jańaózen qalasynda úsh aýysymdaǵy oqý máselesi retteldi. Bul týraly «24 kz» habarlady.
«Shahardy keshendi damytý» baǵdarlamasyna sáıkes, qala ortalyǵynda 900 oqýshyǵa arnalǵan jańa bilim ordasy paıdalanýǵa berildi. Jańaózenge qarasty Rahat kentiniń turǵyndaryna da jańa jyldyq tamasha tartý jasaldy. Otyz myń halqy bar aýylda zaman talabyna saı salynǵan emhana el ıgiligine qyzmet jasaıtyn boldy.
Jańa mektepte oqýshylardyń sapaly bilim alýyna tolyq jaǵdaı jasalǵan. Bul jerde 3 birdeı kompıýter synyby, ınteraktıvti taqtalarmen jabdyqtalǵan birneshe kabınet, jaratylystaný pánderi úshin arnaıy zerthanalar bar. Qajetti qural-jabdyqtarmen qamtylǵan sport zaldary men kitaphana jumys istep tur. Bilim oshaǵyn salýǵa memleket qazynasynan 1,5 mlrd. teńge bólingen eken. «Endi bir aýysymda oqyp, tústen keıin UBT-ǵa daıyndalýdyń múmkindigi týdy. Jalpy aıtqanda, bul ıgi is barlyq oqýshylardyń kópten kútken qýanyshy edi», - deıdi oqýshy Tilektes Saparbaeva.
Jańaózen qalalyq bilim bóliminiń basshysy Gúláıim Azannyń málimdeýinshe, jańa oqý jyly basynda Bostandyq shaǵyn aýdanynda 624 oryndyq mektep paıdalanýǵa berilgen. Arada sanaýly ýaqyt ótkende Teńge aýylynda 900 oryndyq mektep óz oqýshylaryna esigin aıqara ashty. Osynyń negizinde úsh aýysymda oqý máselesi retke keltirilgen.
Baqytbek Keneshuly.
Derekkóz: «24 kz»
Foto: Nomad.su
