Sýrette: Jitiqara aýdandyq polısııa bóliminiń bastyǵy Bolat Imanov
Aqpannyń aq boranynan kólik jaryǵy taıaq tastam jerden árige aspaıtyn kúre joldyń ústinde sońǵy eki kún ishinde birlesken qutqarý qyzmetteri 14 apattyq-qutqarý operasııasyn, 2 izdestirý sharasyn júrgizgen. Nátıjesinde, jol boıynda qar qursaýynda qalǵan, ishinde on shaqty bala bar, 169 adam qutqaryldy.
«Avtokólik joldarynda qalyń qarǵa batyp qalǵan 25 avtokólikti súırep shyǵaryp, qaýipsiz jerge jetkizdik. Jalpy, sońǵy eki kún ishinde qarly borannyń saldaryn joıý jumystaryna 55 qutqarýshy, TJD men polısııa departamentiniń 116 tehnıkasy qatysty. 37 arnaıy tehnıka men jol qyzmetiniń 50 jumysshysy avtokólik joldaryndaǵy qar úrlep tastaǵan jerlerdi arshý jumystarymen aınalysyp jatyr», - dedi tótenshe jaǵdaı departamentiniń bastyǵy Birjan Kárimov.
Sońǵy eki kún ishinde qarly borannyń saldarynan kúre joldarda kólik qaqtyǵysy da jıiledi. Máselen, 23 aqpan kúni saǵat 14:00 shamasynda Qostanaı – Qarabutaq baǵytyndaǵy kúre joldyń boıyndaǵy Áıet ózeninen ótetin kópirdiń ústinde 5 birdeı avtokóliktiń soqtyǵysyp qaldy. Oblystyq polısııa departamenti basshysynyń keńesshisi Elena Kasharınanyń aıtýynsha, JKO nátıjesinde «Leksýs» avtokóliginiń júrgizýshisi dene jaraqatyn alǵan. «Áýeli «Folksvagen» avtokóligi men shaǵyn avtobýs soqtyǵysyp qalady. Jol apatyna túskenderdiń jaǵdaıyn bilmek bolyp taǵy bir shaǵyn avtobýs kelip toqtaǵanda, onyń artynan qytaılyq júk kóligi kelip soqqan. Keıin tórteýine «Leksýs» kelip soǵylady» - dedi E.Kasharına.
Qutqarýshylar aqpannyń ajal úrlegen dúleı boranynan arashalap qalǵan jolaýshynyń biri – Jitiqara qalasynyń turǵyny Kúlásh Kóbenova. Ol 23-aqpan kúni boran endi bastalyp jatqanda taksıge minip Qostanaıdan Jitiqaraǵa qaraı jolǵa shyqqan. Birazdan keıin aınala aqtútekke aınalyp, joldy kórý qıynǵa soǵa bastaıdy. Jitiqaraǵa 30 shaqyrym qalǵanda tórt jolaýshy mingesken «VAZ 21114» avtokóligi baǵytyn joǵaltyp, jol shetine shyǵyp ketedi. Bıik joldyń shetindegi qalyń qarǵa jartylaı batyp qalǵan kólikti adam kúshimen súırep shyǵarý múmkin emes.
«Biz Jitiqara qalasynyń polısııa bólimine habarlasyp kómek suradyq. Kezekshi: «Kútińizder, qazir qutqarý jasaǵy jolǵa shyǵady» - dedi. Aıtqandaı-aq, qutqarýshylar da tez jetti», - deıdi K.Kóbenova.
Qar qursaýynda qalǵan jolaýshylardan habar túsisimen Jitiqarada aýdandyq polısııa bólimi bastyǵynyń jetekshilik etýimen arnaıy top qurylyp, qutqarýshylar dereý jolǵa shyǵady. Oqıǵa ornyna eki «ÝAZ» kóligimen jetken qutqarý toby qar qursaýynda qalǵan jolaýshylardy óz kólikterine mingestirip, keri qaıtady. Biraq kólikteri kúrtik qarǵa qaıta-qaıta batyp qala bergen soń, polıseılerdiń ózderi kólikten túsip jaıaý júrýge týra kelgen. Eki shaqyrymnan keıin Prıgorodnoe eldi mekenine jetken qutqarýshylar jolaýshylardy jergilikti kásipkerdiń kúzet ǵımaratyna ornalastyrady.
«Qutqarýshylar kelip jetpegende, aman qalýymyz ekitalaı edi. О́ıtkeni, alǵash jol shetindegi qalyń qarǵa jartylaı batyp qalǵan kóligimizdi boran áp sátte kórsetpeı tastady. Kóliktiń esigin ashpaq turmaq, janyna jaqyndaı almaı qaldyq. Aıaq-qolymyzdan jan ketip, úmit úzile bastaǵanda qutqarýshylar da jetti», - dedi jolaýshylardyń biri Tatıana Myslık.
Jol kúzetindegi tártip saqshylary sońǵy táýliktiń ishinde 40-tan astam avtokólikti qar qursaýynan alyp shyqqan.
Oblystyq tótenshe jaǵdaı departamentiniń málimetinshe, qarly boranǵa baılanysty óńirde respýblıkalyq jáne oblystyq mańyzy bar 19 avtokólik jolynyń jekelegen ýchaskelerinde áli de kólik qozǵalysyna ruqsat joq.
