Qoǵam • 26 Aqpan, 2021

Jaqsylyqqa jetelegen joba

36 ret kórsetildi

Elbasy Nursultan Nazarbaev 2019 jylǵy 23 qańtarda Jastar jylynyń saltanaty ashylý rásiminde sóılegen sóz­inde stýdentter qaýymynyń erikti­lik pen qaıyrymdylyqtyń qýatty resýrsy ekendigin aıta kelip, Úkimetke volon­ter­likpen aınalysatyn stýdentterdiń stıpendııasyn arttyrýdy tapsyrǵan bolatyn.

A.Baıtursynuly atyndaǵy Qos­tanaı óńirlik ýnıversıtetinde byltyr volonterlikpen aınalysatyn stýdent-jastardyń sany eki eseden artyq ósken. Buǵan Elbasy tapsyrmasyna sáıkes atalmysh ýnıversıtette tıimdi júzege asyrylyp jatqan «Áleýmettik stýdenttik kredıt» jobasy jáne Qostanaıǵa jumys saparymen kelgen Memleket basshysy Qasym-Jomart Toqaevtyń Jastar saraıynda qostanaılyq stýdenttermen kezdesip, byltyrǵy jyldy «Volonter jyly» dep jarııalaýy yqpalyn tıgizip otyr. Atalmysh joba boıynsha stýdentterdiń volonterlik qyzmetine aqy tólenedi.

Joǵary oqý ornyndaǵy volon­ter­ler qozǵalysyna «Aıaly jas­tar» stýdenttik klýby jetekshilik etedi. Azamattyq ustanymy qalyp­tasqan, belsendi erikti jastar osy klýbtyń aınalasyna birigip, túr­li qaıyrymdylyq sharalaryna qa­tysady. Byltyr qańtar aıynan bastap ýnıversıtet jastary Qazvolunteer.kz ınternet portalyna tirkelip, túr­li mekemeler usynǵan portaldaǵy bos vakansııalardy tańdap alyp, «Áleý­mettik stýdenttik kredıt» jobasyna belsendi atsalysa bas­tady.

Atalǵan joba aıasynda stý­den­t­­ter kóbine jergilikti emhana­larǵa ba­ryp, qart kisiler men so­zyl­maly dert­ke shaldyqqan naýqas­tardyń mekenjaıyna dári-dár­mekter, azyq-túlik paketterin jet­kizip berip turǵan. Byl­tyr indet asqynyp ketkende emdeý meke­melerine jan-jaqtan kelip jat­qan ottegi ballondary men gý­ma­nıtarlyq kómek zattaryn túsirisken.

– Sonymen qatar bizdiń volonterler ınklıýzıvti bilim berý, qazaq tili, aǵylshyn tili, kompıýterlik saýattylyqtan qosymsha sabaq berý, oblys ortalyǵynda aǵash kóshetterin egý, egde jastaǵy adamdarǵa qolqabys etý jumystarymen aınalysty. Biz «Qar­jy ortalyǵy» aksıonerlik qoǵa­myna árbir eriktiniń naqty atqarǵan jumysy týraly esep berip otyramyz. Olar esepti tekserip, stýdentterdiń jeke esepshotyna tólemaqysyn jiberedi. Volonter 20 saǵat jumys istese, 20 myń teńge, al 50 saǵat jumys istese, 50 myń teńge alady, – dedi «Aıaly jastar» stýdenttik klýbynyń jetekshisi Vıktorııa Gaan.

«Áleýmettik stýdenttik kredıt» jobasyna qatysatyn stýdentter balalar úıi men qarttar úıine, basqa da áleýmettik mekemelerge volonter retinde baryp, kómek kórsetip turady.

– Byltyr bizdiń gýmanıtarlyq mamandyqtar boıynsha bilim alyp jatqan joǵary kýrs stýdentteri jyl boıy Qostanaıdaǵy oblystyq Balalar úıi men Kámeletke tolmaǵandarǵa arnalǵan beıimdeý ortalyǵynyń tárbıelenýshilerine onlaın sabaqtar men túrli trenıngter ótkizdi. Olardyń bárine «Áleýmettik stýdenttik kredıt» boıynsha aqy tólenip turdy. Mysaly, ótken aıda áleýmettik mekemelerde sabaq berip júrgen 34 stýdenttiń 9-y 50 saǵat júkteme oryndap, 50 myń teńgeden aldy, al 25 stýdentke 20 saǵattyq jumysy úshin 20 myń teńgeden tólendi. Biz Jastar resýrstyq ortalyǵymen ty­ǵyz baılanysta jumys isteımiz. Stý­dent­terge jumysty kóbine osy orta­lyqtyń mamandary taýyp beredi. Qazir olar birneshe jańa joba usynyp otyr, – dedi ýnıversıtettiń jastar isi jó­nindegi komıtetiniń mamany Aınur Qanatqyzy.

Volonter stýdentter Ahmet Baı­tur­­­syn­uly atyndaǵy ýnıversıtetke qaras­ty ınstıtýttar men kafedra­larda uıymdastyrylatyn qaıyrym­dylyq shara­laryna da atsalysyp turady. Máse­len, qańtar aıynda ótken «Men – donor­myn» sharasyna 50 shaqty stýdent qatysyp, qan tap­syrdy. Ýnıversıtet jas­tary «Biz – birgemiz!» aksııasy aıasyn­da uly aǵartý­shy Y.Altynsarın kesene­siniń aý­maǵyn tazartyp turýdy óz mo­ıynda­ryna alǵan. Sondaı-aq turaq­ty túrde jalǵyzbasty qarttardyń úıle­rine baryp, qar kúrep, azyq-túligin ákep berip, qolǵabys kórsetip turady. Buǵan qosa, erikti stýdentter sońǵy úsh jyl ishinde týabitti dertke shaldyq­qan 6 balanyń emdelýine qol ushyn sozyp, qaıyrymdylyq sharalaryn uıym­dastyrý arqyly qarjy jınap bergen.

– Qazir, ókinishke qaraı, pan­de­mııaǵa baılanysty volonterlerge «Áleýmettik stýdenttik kredıt» jobasy boıynsha jumys usynatyn mekemeler azaıyp qaldy. Soǵan qaramastan, kóptegen stýdentter volonterlikpen jobadan tys aınalysyp júr. Olarǵa ýnıversıtet basshylyǵy da barynsha qoldaý kórsetip otyrady. Taıaýda ǵana ózimizben birge ýnı­versıtette oqıtyn Sultanmurat Táshenov qymbat ota jasatty. Biz óz tarapy­myzdan qaıyrymdylyq aksııasyn ótkizdik. «Teńiz tamshydan qurala­dy» demekshi, oqytýshylar men stýdent­ter bolyp Sultanmurattyń ári qaraı tez beıimdelip, aıaqqa turyp ketýine demeý bolatyn qarjy jınap berdik. Biz túrli qaıyrymdylyq shara­la­ryn jyl on eki aı boıy úzbeı ótkizip tura­­myz. Qarttardyń úı sharýasyna kó­­mek­tesemiz, al balalar úıindegi balǵyndarǵa tańerteńgilik oıyn-saýyq sharalaryn, tanymdyq oıyndar men tre­nıng­ter uıymdastyramyz, – dedi Vıktorııa Gaan.

Byltyr kúzde A.Baıtursynuly atyn­­daǵy ýnıversıtet pen О́.Sultan­ǵazın atyn­daǵy pedagogıka ınstıtýty qosylyp, óńirlik ýnıversıtet bolyp qaıta qurylǵanda eki bilim ordasynyń volon­terlik klýbtary da bir uıymǵa birikken. Sodan beri eriktiler sany edáýir kóbeıip, sharapatty jumystyń aýqymy da keńeıe túsken.

Qazir volonterler karantın talaptaryna baılanysty balalar úılerine bara almaıdy. Alaıda olar «Arnaıy áleýmettik qyzmet kórsetý ortalyǵy» men otbasylyq úlgidegi «Januıa» balalar úıindegi balǵyndarǵa apta saıyn ZOOM platformasy arqyly oflaın rejimindegi beınekonferensııalar uıymdastyryp, balalarmen birge túrli oıyndar oınap, sýretter salady, birneshe topqa bólinip, vıktorınalyq oıyndar oınatady. Odan qaldy, sergitý jattyǵýlaryn jasap, bı bılep, án aıtady. Balalarǵa keregi – úl­kenderdiń nazary men jyly qabaǵy ǵoı. Volonterler kóp balaly otbasylarda tárbıelenip jatqan oqýshy­larmen de onlaın baılanysqa shyǵyp, olardyń úı tapsyrmasyn oryndaýyna kómektesip, tanymdyq máni bar damytý sabaqtaryn ótkizip turady.

Búginde Qostanaı ýnıversıtetinde oqıtyn erikti jastardyń kóbi qa­shyqtan bilim alyp jatyr. Al oblys or­talyǵynda qalǵan volonterler qalalyq ardagerler keńesinen tyl eńbek­ker­leriniń tizimi men turǵy­lyqty mekenjaıyn alyp, qamkóńil qarııalardyń aýlasyn sońǵy kúnderi jaýǵan qalyń qardan tazartýǵa kiristi.

 

Qostanaı oblysy

Sońǵy jańalyqtar

Aısberg aqıqaty

Ádebıet • Keshe

Joq kitapty izdeý

Ádebıet • Keshe

Krest-kedergi...

Ádebıet • Keshe

Zaısanda mal qyrylyp jatyr

Aımaqtar • Keshe

Uqsas jańalyqtar