О́zimiz kórgendeı, sýret kórmesine «Ár sýrette – ómir sáýlesi» taqyrybyndaǵy qazaq áıelderiniń túrli portretteri, ǵımarattar, taý jáne landshafttar, tabıǵat kórinisteri beınelengen jumystar qoıylypty.
Portretterde ulttyq kıimdegi qazaq qyzdarynyń beıneleri usynylǵan. Bular arqyly avtordyń qazaq áıelderiniń jan dúnıe sulýlyǵyn, náziktigin, meıirimdiligin kórsetkeni baıqalady.
О́ziniń aıtýynsha, ol kóbinese maıly keskindeme, pastel sııaqty grafıkalyq tehnıkada jumys isteıdi. Maıly boıaýmen salynǵan «Almaty», «Pavlodar» bólimindegi kartınalary da erekshe tásilmen beınelenipti.
– Almaty taqyrybyna kelsek, 2015 jyly bir top sýretshimen birge osy qala mańyndaǵy taý ishinde, baqtarda bolyp, tabıǵatty tamashalaǵan edik. Sýretshi úshin bul shyǵarmashylyq shabyt týdyratyn kórkem kórinister ǵoı. Bizge sol joly Úlken Almaty kóliniń mańaıynda etıýdter, eskızder, foto materıaldar negizinde sýret salýǵa múmkindik berildi. Nobaılar akvarelmen, gýashpen jazyldy, odan ári osy eskızder negizinde sýrettemeler jasaldy, al osy sýrettemeler maıly keskindeme tehnıkasynda kenepte oryndaldy, – deıdi Altyn Ibraıqyzy.
Sýretshi Altyn Qısamedınovanyń «Kereký – Pavlodar» atty 30-ǵa jýyq sýreti bar, al bul kórmeden oblys ortalyǵynyń eski aýmaǵyna arnalǵan «Chehov drama teatry», «Kóne qalanyń kúzi», «Alıýmınstroı aýdany», «Saıajaı shaǵyn aýdany», «Qarly qys» taqyrybyndaǵy sýretterimen tanystyq.
Altyn Ibraıqyzy Semeıdegi pedagogıkalyq ınstıtýttyń mektepterdegi kórkemsýret pániniń muǵalimderin daıarlaıtyn bólimin bitirgen. Kishkentaıynan Ertis ózeniniń jaǵasynda týyp-ósken qyz sýretshi bolsam degen armanyn osylaı júzege asyrdy. Oqý bitirgen soń, Pavlodarǵa qaıta oralyp mektepterde, kolledjderde oqýshylarǵa, stýdentterge sabaq berdi. Sýretshi talantty shákirtter tárbıeledi.
Pavlodar
