Aımaqtar • 27 Aqpan, 2021

Qostanaı oblysynda joǵalǵan jylqyshy 6 kúnnen keıin tabyldy

3795 ret kórsetildi

Qostanaı oblysynda osydan alty kún buryn joǵalyp ketken jylqyshy búgin saǵat 11.30-da Qaraǵandy oblysynyń shekarasynan tabyldy.  

Oblystyq PD-nyń málimetinshe, 21-aqpan kúni Amangeldi aýdany Úrpek aýylynyń turǵyny Gúlnur Ospanova «Evrazııa-Invest» JShS-ne tıesili Biráli mekeninde jylqy baǵyp júrgen tabynshy 1971 jyly týǵan Amangeldi Turjanovtyń 22-aqpanǵa qaraǵan túni jylqy izdep ketip qaıta oralmaǵany týraly habarlama túsirgen. 

Dereý Amangeldi aýdandyq polısııa bólimi men tótenshe jaǵdaı bóliminiń qyzmetkerlerinen birlesken izdeý toby qurylyp, 5 kún boıy izdestirý sharalary júrgizilgen. Joǵalǵan jylqyshy qarly boran basylǵan soń áýege kóterilgen tikushaqtyń kómegimen Obaly qonysynyń mańynan tabylyp, Jezqazǵan qalalyq aýrýhanasyna jetkizilgen. Dárigerler tabylǵan jylqyshy esin biledi, jaǵdaıy qanaǵattanarlyq deıdi.    

«Izdestirý sharalaryna jol talǵamaıtyn Nıva Bronto Marsh kóligimen 5 qutqarýshy shyqqan. Biraq qalyń qar men kúshti boran úlken kedergi keltirip, izdeý nátıje bere qoımady. Qutqarýshylar jylqyshymen eshqandaı baılanys ornata almady. 26 aqpan kúni Jezqazǵanǵa Nur-Sultan qalasynan QR TJD «Kazavıaspas» AQ-ǵa tıesili Mı-8AMT tikushaǵy ushyp keldi. Alaıda aýa raıy qolaısyz bolǵandyqtan tikushaq ol kúni usha alǵan joq» - dep málimdedi TJD-nyń baspasóz qyzmeti.

Ábden álsirep, áreń qozǵalyp jatqan Amangeldi Turjanov kelesi kúni, ıaǵnı 27 aqpanda saǵat 10:50-de qamys arasynan tabylǵan. Jansebil jylqyshy 6 kún boıy dalada qalyń qardy pana qylǵan. Al astyndaǵy esti janýar jylqyshyny tastap ketpeı, ıesiniń janynda bolǵan.

 

Sońǵy jańalyqtar

ShQO-da mal urylary ustaldy

Aımaqtar • Búgin, 11:00

Uqsas jańalyqtar