Bıylǵy el chempıonaty tosyn jaǵdaılarǵa, kútpegen jeńisterge jáne jańa ornatylǵan rekordtarǵa toly boldy. Máselen, medal jıyntyǵy boıynsha birneshe jyldan beri aldyna jan salmaı, jalpykomandalyq kórsetkishte birinshi oryndy eshkimge bermeı kele jatqan shyǵysqazaqstandyq sportshylar bıyl bıik belesten kórine alǵan joq. Esesine qaraǵandylyq jeńilatletterdiń qarqyny qatty boldy. Úsh kúnde 10 altyn, 7 kúmis jáne 8 qola júlde jeńip alǵan kenshiler qalasynyń sportshylary Kendi Altaı ókilderin basyp ozdy.
Sondaı-aq byltyrǵy chempıonatta 60 metrge kedergiler arqyly júgirýde 30 jylǵa jýyq ýaqyttan beri jańarmaǵan Andreı Gýtovtyń rekordyn buzǵan Davıd Efremov bıyl taǵy da rekord ornatyp, óziniń byltyrǵy nátıjesine túzetý engizdi. О́tken jyly atalǵan qashyqtyqty 7,67 sekýndta júgirip ótken Efremov, bıyl bul mejeni 7,65 sekýndta baǵyndyrdy.
О́skemendegi jarystyń baǵdarlamasyna azdaǵan ózgeris engizilgenin de baıqadyq. Uıymdastyrýshylar bıylǵy jarysqa ardagerler arasynda 4h200 metrge aralas estafetalyq júgirý saıysyn qosqan eken. Bul synda Shyǵys Qazaqstan, Qaraǵandy jáne Almaty oblystarynan kelgen 3 qurama komanda qatysty.
El birinshiliginiń qorytyndysy boıynsha, erler arasynda 60 jáne 200 metrge júgirýde qaraǵandylyq Vıtalıı Zems, 400 metrge jarysta Azııa chempıonatynyń qola júldegeri Mıhaıl Lıtvın (SQO), 800 jáne 1 500 metrge júgirýde shymkenttik Ábdiláziz Ábdiqaýymov, 3000 metr qashyqtyqta jambyldyq Dmıtrıı Ivanchýkov top jarsa, qyzdar arasynda pavlodarlyq Olga Safronova (60 m), almatylyq Vıktorııa An (Zıabkına) (200 m), jambyldyq Svetlana Golendova (400 m), qostanaılyq Ekaterına Grısaı (800 m), shyǵysqazaqstandyq Arına Gladysheva (1500 m) jáne Almaty oblysynyń ókili Aqbaıan Nurmamet (3000 m) Qazaqstan chempıony atandy.
Upaı kórsetkishi jalpykomandalyq esep boıynsha da birinshi oryndy Qaraǵandy oblysynyń quramasy (24 547 upaı) qanjyǵalaryna baılady. Ekinshi oryndy Shyǵys Qazaqstan oblysy (23 132 upaı) ıelense, úzdik úshtikti Almaty qalasy (16 694) túıindedi.
