Aýa raıy • 01 Naýryz, 2021

Kóktem keshikpeı jetedi: Naýryz aıyna arnalǵan aýa raıy boljamy

Elimizdiń kóptegen aımaǵynda kóktem belgilengen merziminde kelip jetedi, dep habarlaıdy Egemen.kz

Qazgıdromet boljamyna sáıkes, 2021 jylǵy naýryzda Qazaqstan Respýblıkasynyń basym bóliginde sıklondardyń ótýimen jáne Iran aýdandarynan jyly aýa massalarynyń jyljýmen aýa temperatýrasynyń joǵary fony kútiledi, respýblıkanyń basym bóliginde aýanyń ortasha aılyq temperatýrasy normadan 1° joǵary, respýblıkanyń soltústik-batys bóliginde ǵana norma shamasynda boljanady.

Bir aı boıy sıklondar men antısıklondardyń jıi aýysýyna baılanysty aýa temperatýrasynyń kúrt ózgerýi boljanady. Temperatýra kontrasty 10° jáne odan da kóp bolýy múmkin.

Aıdyń basynda: belsendi sıklondardyń áserinen respýblıka boıynsha aýa raıynyń turaqsyz sıpaty boljanady: jaýyn-shashyn, eldiń ońtústik-shyǵys bóliginde qar aralas jańbyr qatty jaýýy múmkin, jel kúsheıedi (soltústik jartysynda burqasynmen), tuman jáne kóktaıǵaq qubylystary kútiledi. Eldiń ońtústik jartysynda jaýyn-shashyn kóbinese jańbyr túrinde, soltústik jartysynda aralas jaýyn-shashyn (jańbyr, qar) túrinde boljanady.

Birinshi onkúndik boıy: Qazaqstan aýmaǵy boıynsha aýa temperatýrasynyń aýytqýy boljanady: soltústik jartysynda kúndiz álsiz oń tańbalydan teris tańbaly mánderge deıin, ońtústik jartysynda +10+15°S-tan 0,+7°S-qa deıin, eldiń batysy men soltústik-batysynda -3-10°S-tan -1+6°S-qa deıin.

Birinshi jáne ekinshi onkúndiktiń jekelegen kúnderi: Skandınavııa men Sibir aýdandarynan sýyq aýa massalarynyń áserinen túngi saǵattarda termometr baǵanalary elimizdiń soltústik jartysynda -13-25°S deıin, ońtústik jartysynda -5-15°S deıin tómendeýi kútiledi.

Aıdyń ekinshi jartysynda: QR-nyń soltústik, ortalyq jáne shyǵys óńirlerinde jylý tolqyndarynyń áserinen kúndizgi aýa temperatýrasy jekelegen kúnderi +3+10°S deıin; eldiń ońtústigi men batysynda +10+15°S deıin, úshinshi onkúndikte +15+25°S deıin joǵarylaıdy. Jaýyn-shashyn mólsheri normadan kóp, tek eldiń ońtústik-shyǵysynda jáne ońtústik-batysynda norma shamasynda (QR basym bóliginde norma: 10-25 mm, ońtústik pen ońtústik-shyǵystyń taýly aýdandarynda 55-103 mm deıin, shyǵysta 8-30 mm) boljanady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz