Qostanaıda 1921-1922 jyldardaǵy náýbetke qatysty dóńgelek ústel otyrysy ótti

Aımaqtar • 01 Naýryz, 2021

Qostanaıda 1921-1922 jyldardaǵy náýbetke qatysty dóńgelek ústel otyrysy ótti

Qostanaıdaǵy L.Tolstoı atyndaǵy oblystyq kitaphanada «Q.Toqaevtyń «Táýelsizdik bárinen qymbat» maqalasy: 1921-1922 jyldardaǵy náýbetke 100 jyl» degen taqyrypta respýblıkalyq dóńgelek ústel otyrysy ótti. Zoom baǵdarlamasy arqyly onlaın-rejimde uıymdastyrylǵan jıynǵa elimizdiń ár óńirinen asharshylyq máselesin zerttep júrgen belgili ǵalymdar men magıstranttar, JOO-nyń stýdentteri qatysty.

Nurqanat QULABAEV

Kirispe sóz sóılegen kitaphana dırektory Darıǵa Dúısebaeva ǵylymı-tanymdyq máni bar atalmysh jıyndy uıymdastyrǵan A.Baıtursynuly atyndaǵy Qostanaı óńirlik ýnıversıtetiniń Qazaqstan tarıhy kafedrasynyń ujymyna alǵysyn aıtyp, otyrys jumysyna sáttilik tiledi.

Jıynda Sh. Ýálıhanov atyndaǵy tarıh jáne etnologııa ınstıtýtynyń bas ǵylymı qyzmetkeri, tarıh ǵylymdarynyń doktory Aıjamal Qudaıbergenovanyń «1930-shy jyldary bosqyndardy qaıtarý máselesiniń kóterilýi», Toraıǵyrov Ýnıversıteti KEAQ Qazaqstan halqy Assambleıasy kafedrasynyń meńgerýshisi, tarıh ǵylymdarynyń doktory, professor Sáýle Mamytovanyń «Qazaqstannyń Soltústik-Shyǵysyndaǵy ashtyq qasiretiniń tarıhnamasy men derektemesi», A.Baıtursynov atyndaǵy Qostanaı óńirlik ýnıversıteti Qazaqstan tarıhy kafedrasynyń professory, tarıh ǵylymdarynyń kandıdaty О́tegen Isenovtiń «1921-1922 jylǵy ashtyq: tarıhı tanym», Sh.Sh. Ýálıhanov atyndaǵy Tarıh jáne etnologııa ınstıtýtynyń jetekshi ǵylymı qyzmetkeri, tarıh ǵylymdarynyń kandıdaty qaýymdastyrylǵan professor Altyn Ýaltaevanyń «1937 jylǵy halyq sanaǵy qorytyndysy boıynsha ashtyq nátıjesi», Sh.Sh. Ýálıhanov atyndaǵy Tarıh jáne etnologııa ınstıtýtynyń ǵalym hatshysy, PhD doktory Mahabbat Qozybaeva «Saıası qýǵyn-súrgin qurbandaryn aqtaý jónindegi komıssııanyń jumysy týraly» taqyrybyndaǵy baıandamalary tyńdaldy.

Dóńgelek ústel otyrysyn qorytyndylaǵan Qostanaı óńirlik ýnıversıteti qazaqstan tarıhy kafedrasynyń meńgerýshisi, PhD doktory Raýan Baıdaly óziniń ashtyq qurbandary týraly ǵylymı joba

«Búgingi taqyrypqa qatysty kezinde elimizde arnaıy memlekettik komıssııa jumys jasady. Kóptegen qujattar kóterildi. Bul komıssııa 1930 jyldardaǵy asharshylyqqa «Qazaq halqyna jasalǵan genosıd» dep baǵa bergen. Ony dáleldeıtin tom-tom qujattar bar. Biraq bul máseleniń áli kúnge deıin sońǵy núktesi qoıylǵan joq. Bul máseleni sheteldik ǵalymdar da zerttep jatyr. 1928 jylǵy baılardy kámpeskeleý, otyzynshy jyldardaǵy ujymdastyrý, ujymdastyrýǵa qarsy bas kóterýler, qazaqtardyń shetelge qonys aýdarýy, mine, osynyń bári ashtyqpen baılanysyp jatyr. Taıaýda «Egemen Qazaqstan» gazetinde Memleket basshysy Qasym-Jomart Toqaevtyń «Táýelsizdik bárinen qymbat» atty maqalasy jarııalandy. Osy maqalasynda Prezıdent 1921-22 jylǵy ashtyqqa baılanysty kesek másele kóterip, tarıhshylarymyzǵa kóptegen jaýapty mindetter júktedi. Bıyl HH ǵasyrdyń basynda qazaqtyń teń jartysyn qynadaı qyryp ketken náýbet jyldardyń qasireti ǵylymı túrde jan-jaqty zerttelip, oǵan túbegeıli saıası baǵa beriletin jyl bolady dep úmittenemiz», dedi.

Qostanaı oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz