Úkimet • 02 Naýryz, 2021

Úkimet medısınalyq-sanıtarııalyq alǵashqy kómekti damytý sharalaryn qarady

15 ret kórsetildi

Premer-Mınıstr Asqar Mamınniń tóraǵalyǵymen ótken Úkimet otyrysynda medısınalyq-sanıtarııalyq alǵashqy kómekti (MSAK) damytý jónindegi sharalar qaraldy, dep habarlaıdy Egemen.kz.

Densaýlyq saqtaý mınıstri Alekseı Soı, Batys Qazaqstan oblysynyń ákimi Ǵalı Esqalıev, Atyraý oblysynyń ákimi Mahambet Dosmuhambetov, Qyzylorda oblysynyń ákimi Gúlshara Ábdiqalyqova baıandama jasady.

«Memleket basshysy Qasym-Jomart Kemeluly Toqaevtyń halyqqa arnaǵan Joldaýynda Úkimetke medısınalyq alǵashqy kómekti uıymdastyrýdyń tásilderin túbegeıli qaıta qaraýdy tapsyrdy. Halyqtyń basym kópshiligine, ásirese aýyldy jerlerde mobıldilik pen qoljetimdilik asa qajet. Bul mindetter “Nur Otan” partııasynyń saılaýaldy baǵdarlamasyn oryndaý jónindegi jol kartasynda belgilengen», — dedi A. Mamın. 

Premer-Mınıstr Aqmola, Soltústik Qazaqstan jáne Shyǵys Qazaqstan oblystaryndaǵy ambýlatorııalyq-emhanalyq nysandardy tehnıkalyq jabdyqtaý deńgeıiniń tómendigi men ǵımarattardyń tozýyn atap ótti. Úkimet basshysy aýyldarǵa jumysqa belsendi tartý jáne jas medısına qyzmetkerlerin áleýmettik qoldaý qajettigin atap ótti. Mysal retinde Qostanaı, Soltústik Qazaqstan jáne Atyraý oblystaryndaǵy osyndaı jumystyń oń tájirıbesin keltirdi.

«2025 jyldyń sońyna deıin 487 obektini salý josparlanǵan. Sonymen qatar 600-den astam alǵashqy medısınalyq kómek kórsetý obektilerin kúrdeli jóndeýden ótkizý qajet. Qabyldanyp jatqan sharalar, ásirese, aýyldyq eldi mekenderdi alǵashqy medısınalyq kómekpen qamtýdy edáýir keńeıtýge múmkindik beredi», — dedi A. Mamın.

Úkimet basshysy óńirlerdiń ákimderine bir aı merzimde Densaýlyq saqtaý mınıstrligine jyldar men eldi mekender boıynsha bólingen alǵashqy densaýlyq saqtaý obektileriniń ınfraqurylymyn damytýdyń jol kartasyn ázirlep, joldaýdy tapsyrdy.

Ákimdikterge Densaýlyq saqtaý mınıstrligimen birlesip, óńirlerde jańa ýchaskeler ashý, jeke sektordy damytý jáne tartý arqyly MSAK dárigerleriniń júktemesin azaıtýdy qamtamasyz etý, sondaı-aq jas medısına qyzmetkerlerin, ásirese aýylǵa jumysqa kelgen jas mamandardy materıaldyq yntalandyrý sharalaryn qabyldaý tapsyryldy.

Sońǵy jańalyqtar

Qansha adam vaksına saldyrdy?

Koronavırýs • Búgin, 09:40

879 qazaqstandyq koronavırýstan emdelip shyqty

Koronavırýs • Búgin, 09:22

847 adam koronavırýs juqtyrdy

Koronavırýs • Búgin, 09:00

Uqsas jańalyqtar