Ulttyq banktiń habarlaýynsha, tólem kartalarymen jasalǵan on tranzaksııanyń toǵyzy qolma-qol aqshasyz jasalǵan. 2020 jyly qazaqstandyq emıtentterdiń tólem kartalaryn qoldana otyryp, 35,3 trln teńgeniń 2,9 mıllıard qolma-qol aqshasyz operasııasy júzege asyrylǵan. Bul 2019 jylǵy kórsetkishten, sáıkesinshe, 2,4 jáne 2,5 ese asyp túsedi.
Pandemııa qolma-qol tranzaksııalardyń azaıyp, onlaın-dúkenderdiń kúrt kóbeıýine alyp keldi. Eldegi qolma-qol eseptesý kóleminiń kenetten azaıyp ketýi de osyny dáleldeı túsedi. Qolma-qol aqshamen esepteseý byltyr 21 paıyzǵa azaıǵan (297 mln operasııa). Tólem kartasyn qoldanýshylar 16,6 trln teńgeni qolma-qol aqshaǵa aınaldyrypty.
Osy jyldyń 1 aqpanyndaǵy jaǵdaı boıynsha 49,3 mıllıon tólem kartasy aınalymda boldy, 26,5 mıllıon kartany (53,8 paıyz) ustaýshylar belsendi paıdalanady. Tólem kartalary arqyly taýarlar men qyzmetterge aqy tóleý ınfraqurylymy da keńeıip keledi. Tólem kartalaryn qabyldaıtyn kásipkerler sany artty. Karta arqyly tólem qabyldaıtyn kásipkerler sany – 108 myńnan, al saýda núkteleri – 169 myńnan asypty. Qazaqstanda barlyǵy 203 myń POS-termınal jumys isteıdi.
2019 jylmen salystyrǵanda, karta arqyly tólem qabyldaıtyn bólshek saýda oryndary (26 paıyzǵa) men POS-termınaldardyń (26 paıyzǵa) kóbeıgeni baıqalady. 2020 jyldyń sońyna qaraı POS-termınaldardyń 86 paıyzy kontaktsyz tólem fýnksııasyn qoldanǵan.
