Bul jóninde Premer-mınıstrdiń orynbasary Eraly Toǵjanovtyń qatysýymen ótken Densaýlyq saqtaý mınıstrliginiń ótken jylǵy qyzmetiniń qorytyndylary men bıylǵa arnalǵan mindetteri boıynsha keńeıtilgen alqa otyrysynda málim boldy. Densaýlyq saqtaý mınıstriniń birinshi orynbasary Marat Shoranov óńirlerdegi densaýlyq saqtaý basqarmasynyń basshylarynan azamattardyń densaýlyǵyn jaqsartý boıynsha shara qabyldaýdy surady. 2020 jylǵa arnalǵan memlekettik baǵdarlama 4 nysanaly ındıkatorǵa baǵyttalǵan. Bul: azamattardyń ortasha ómir súrý uzaqtyǵyn 73,21 jasqa deıin arttyrý, júrek-qan tamyry, onkologııalyq, sozylmaly respıratorlyq aýrýlardan jáne qant dıabetinen mezgilsiz qaıtys bolǵandar sanyn 18,86% deıin tómendetý, ana ólimin 17,1-ge deıin azaıtý, 1 myń tiri týǵanǵa shaqqandaǵy náreste ólimin 10,1-ge deıin tómendetý.
Aıta ketelik, ótken jyly óńirdiń densaýlyq saqtaý salasyna 13,7 mlrd teńge baǵyttaldy. Oblystyq qoǵamdyq densaýlyq basqarmasy basshysynyń Marat Pashımovtyń aıtýynsha, birinshi kezekte ana men bala, jansaqtaý, ota jasaý jáne jedel járdem qyzmetin kúsheıtýge maqsat qoıylǵan. Medısınalyq uıymdardyń materıaldyq-tehnıkalyq bazasyn jabdyqtaý maqsatynda 2,5 mlrd teńgege 205 dana medısınalyq tehnıka satyp alyndy. Memlekettik-jekeshelik áriptestik tetigi arqyly 9 feldsherlik ambýlatorııanyń qurylysy júrgizilip, onyń 5-i paıdalanýǵa berilse, bıyl tórteýi ashylady.
Túrkistan oblysy
