Oblystyń bas sanıtarlyq dárigeriniń «Karantındik shekteý sharalaryn kezeń-kezeńimen jeńildetý týraly» jańa qaýlysyna sáıkes, aımaqta karantın qursaýyn keńitetin taǵy da birqatar ózgerister engizildi. Birinshiden, 1 naýryzdan bastap meshit, shirkeý, sobor, sınagogalardyń qyzmetine ruqsat etildi. Biraq dinı nysandarda buqaralyq sharalar, máselen, juma namazyn ótkizýge bolmaıdy. Indettiń etek alýyna jol bermeý jónindegi jedel shtab ókilderi mundaı sharalardy ótkizý áli erterek dep otyr. Sondyqtan meshit janyndaǵy ashanalar qulyptaýly kúıinde qaldy.
Azyq-túlik jáne ózge de taýarlar satatyn ashyq jáne jabyq saýda oryndary, fotosalondar men gúl satatyn dúkender de sanıtarlyq talaptardy qatań saqtaı otyryp jumys kestesine sáıkes belgilengen shtattyq rejimde jumys isteýge kóshti. Alaıda azyq-túlik jáne ózge de taýarlar satatyn jabyq saýda oryndarynyń jeksenbi kúni jumys isteýine tyıym salynǵan.
Sonymen qatar osy dúısenbiden bastap memlekettik mekemelerdiń, kvazımemlekettik sektordyń, ulttyq kompanııalar men kásipkerlik sýbektileriniń keńseleri de jumysqa kiristi. Shekteý talaby boıynsha, mundaı keńselerde otyratyn mamandar sany 15-ten aspaýy kerek. Al qyzmetkerlerdiń 60%-y áli de qashyqtan jumys isteı beredi.
Qostanaıda qalalyq qoǵamdyq kólikter aptanyń barlyq kúni júredi. Jabyq sporttyq-saýyqtyrý jáne fıtnes ortalyqtary qyzmet kórsetý múmkindiginiń 30%-yn paıdalana otyryp saǵat 7-den 22.00-ge deıin jumys istep jatyr. Mádenıet nysandarynda 30 adamǵa deıingi ujymdardyń daıyndyq jumystaryn júrgizýine ruqsat etildi. Teatrlar men kınoteatrlar da jumysyn jandandyrdy. Biraq kórermen zalyna 200 adam syıatyn teatrlardaǵy spektakl qoıylymdaryn 40 adam ǵana tamashalaı alady.
О́tken jumada oblys ákimdiginde KVI taralýyna jol bermeý jónindegi jedel shtabtyń kezekti otyrysy ótti. Jıynda monıtorıngtik toptardyń jumysy qarastyryldy. Monıtorıngtik toptar 1 qańtardan beri 3 315 reıdtik is-shara ótkizip, karantın tártibin buzǵan 351 nysandy anyqtaǵan. Jıyn barysynda oblys ákimi jańadan engizilip jatqan jeńildikterge qaramastan monıtorıngtik toptarǵa óńirdegi sanıtarlyq-epıdemııalyq talaptardyń saqtalýyn qatań baqylaýdy tapsyrdy. «Oblys turǵyndarynan koronovırýstyń taralýyna jol bermeý boıynsha qabyldanyp jatqan barlyq sanıtarlyq-epıdemııalyq normalardy saqtaýdy suraımyn», dedi Arhımed Muhambetov.
Jedel shtabtyń málimeti boıynsha, aqpannyń sońǵy kúni oblystyń 62 turǵyny COVID-19 juqtyrǵan. Qostanaı qalasynda 42 adamnan koronavırýs anyqtaldy. Jalpy, Qostanaı oblysynda 2020 jylǵy 3 sáýirden beri COVID-19 juqtyrǵan 12 374 naýqas tirkelip, 10 900 adam emdelip shyqqan.
Qostanaı oblysy
