Batys Qazaqstan oblysynyń Bas memlekettik sanıtar dárigeri «Batys Qazaqstan oblysy aýmaǵyndaǵy karantındik shekteý sharalary týraly» qaýlyǵa birqatar ózgerister engizdi. Bul boıynsha óńirde karantın talaby biraz jeńildep otyr.
Máselen, memlekettik organdar men kvazımemlekettik sektor uıymdary shtattaǵy adam sany 15 jáne odan kóp bolǵanda qyzmetkerleriniń keminde 60%-yn qashyqtan jumys nysanyna aýystyrýdy usynyp otyr. Buǵan deıin bul talap 80 paıyz bolatyn. Sondaı-aq sanıtar dáriger oblystaǵy jeke kásip nysandaryna da qyzmetkerleriniń keminde 50%-yn qashyqtan jumys isteýge shaqyrdy.
«Birinshi kezekte 50 jáne odan joǵary jastaǵy qyzmetkerlerdi qashyqtan jumys isteýge aýystyrý, jınalystar, keńester, semınarlar, konferensııalardy offlaın rejımde ótkizbeı, tek selektorlyq rejımde jáne beınekonferensbaılanys arqyly ótkizý usynylady» degen qaýlyda.
Jańa qaýlynyń ózgeristeri ásirese bilim salasyndaǵy tártipke biraz ózgeris ákelip jatyr. Mysaly, 2020-2021 oqý jylynyń úshinshi toqsanynda oqýshylar sany 300-ge deıin kontıngenti bar, synyptardaǵy balalar sany 15-ke deıin bolatyn qalalyq jáne aýyldyq mektepterde dástúrli formatta oqytýǵa kóshti. Sondaı-aq 2021 jylǵy 1 naýryzdan bastap jalpy bilim beretin mektepterde 1-den 5-synypqa deıin, halyqaralyq mektepterde 1-den 7-synypqa deıin aralas oqytýǵa kirisedi.
Al oqý bitiretin 9, 11 (12) synyptar aptanyń 6 kúni aralas oqıtyn boldy. Sonyń ishinde pánderdiń 70%-y shtattyq rejımde, 30%-y qashyqtan oqytylady. Olar synypta 15 adamnan artylmaı, áleýmettik qashyqtyqty saqtap, «1 synyp - 1 kabınet» qaǵıdaty boıynsha bilim alady. Mektepte bir ýaqytta bolatyn oqýshy sany jobalyq qýattyń 30%-ynan aspaýy, sanıtarııalyq-dezınfeksııalyq rejımdi, maska rejımin kúsheıtý talap etiledi.
Bilim berý mekemesi ákimshiliginiń sheshimi boıynsha sabaqtan tys ýaqytta 15 adamnan aspaıtyn toptarda oqýshylardy jeke oqytýǵa ruqsat berildi.
Eger mektep oqýshysy koronavırýspen aýyryp qalsa, ol oqıtyn synyp jabylady. Al bir mektepten eki nemese odan da kóp muǵalim, nemese ár synyptyń oqýshylary covid-pen tirkelse, onda mektep ýaqytsha jabylady, - dep túsindirdi Batys Qazaqstan oblysynyń sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaev. Kolledjder men joǵary oqý oryndarynyń I kýrs stýdentteri úshin ekinshi semestrden bastap shtattyq oqýǵa ruqsat berilgen bolatyn. Olar búginde pánderdiń 70%-yn shtattyq rejımde, 30%-yn qashyqtan oqyp jatyr.
О́ńirdegi kópshilik oryndar úshin de karantın talaptary jeńildedi. Mysaly, azyq-túlik jáne azyq-túlik emes jabyq bazarlar saǵat 09.00-den 17.00-ge deıin apta boıy úzilissiz jasaı alady. Buryn olar jeksenbide jabyq bolatyn. Saýda úıleri men ortalyqtary bekitilgen jumys kestesine sáıkes, adam sanyn shekteı jáne sanıtarlyq qaýipsizdik talaptaryn saqtaı otyryp qalypty qyzmet kestesine kóshti.
Nurlybek Mustaevtyń aıtýynsha, jaqyn kúnderi oblysqa «Spýtnık-V» vaksınasynyń 3 myńnan asa ekpesi kelmek. Ol óńirdegi medısına qyzmetkerlerine jáne muǵalimderge arnalǵan.
14-naýryz – Qazaqstannyń batys óńirinde bir-birimen qol alysyp, qushaqtasyp amandasatyn dástúrli «Kórisý» meıramy bolatyn. Biraq sanıtar dárigerler osy dástúrden bıylsha tıyla turýdy usynyp otyr.
Aıta keteıik, Batys Qazaqstan oblysy – koronavırýs indetiniń taralýy boıynsha elimizde «sary aımaqta» qalyp otyrǵan óńirdiń biri.
