Aqyly jol oblys ortalyǵy jáne Qostanaı, Fedorov, Qarabalyq aýdandary arqyly ótedi. Bul aralyqta úsh baqylaý arkasy ornatylǵan. Tólem júıesi ashyq bolady. Iаǵnı, shlagbaýmdar ornatylmaıdy. Kólikterdiń ótý tártibi arnaıy baqylaý arkalaryna bekitilgen kameralar arqyly baqylanady.
- Jol júrgizýshilerden túsken qarjy qory esebinen ózin-ózi qamtamasyz etedi. Aqyly joldardyń kútimine memlekettik bıýdjetten qarajat bólinbeıdi. Bul bıýdjettegi qarajatty basqa da áleýmettik mańyzdy qajettilikterge jumsaýǵa múmkindik beredi, - deıdi «QazAvtoJol» UK» AQ ókili Tursyn Álimbekov.
Taǵy bir respýblıkalyq mańyzy bar kúre jol – Qostanaıdan Nur-Sultan qalasyna aparatyn avtojoldyń Esil aýdany shekarasyna deıingi tusy da aqyly bolady. Oblysta paıda bolatyn aqyly baǵyttardyń ekeýi de 2-shi jáne 3-shi sanattaǵy joldarǵa jatady. Iаǵnı, jol tek júk kóligi úshin ǵana aqyly bolady. «QazAvtoJol» mamandary jańa joldar júrgizýshilerdiń qaýipsizdigi men zamanaýı talaptarǵa jaýap beretindigin aıtady. Barlyq aqyly avtojolda mindetti túrde túngi jaryqtandyrý jáne jaýapty ýchaskelerde maldyń ótýine tosqaýyl bolatyn qorshaýlar, sondaı-aq túngi ýaqytta jol baǵdaryn anyq kórýge kómektesetin jaryq shaǵylystyrǵyshtar men katafottar bolady.
Mamandardyń aıtýynsha, aqyly joldy engizý jol boıyndaǵy ınfraqurylymdy damytýǵa aıryqsha áser etpek. Máselen, jolboıynda demalatyn oryn, kólik turaǵy, qonaq úıler, sýpermarketter, dárethanalar, dárihanalar boı kóteredi. Bul jańa jumys oryndaryn ashýǵa múmkindik beredi. Aqyly joldar polısııa baqylaýynda bolady. Jol qyzmeti kólik júretin bóliktiń jaı-kúıin qadaǵalap, qysy-jazy kólik jolynnyń taza bolýyn qamtamasyz etedi jáne tótenshe jaǵdaı kezinde jedel kómek kórsetedi.
Qostanaı oblysy
