Senat depýtttary ónerkásiptik qaýipsizdik, ındýstrııalyq aımaqtar, janýarlar álemi, erekshe qorǵalatyn tabıǵı aýmaqtar, energetıka, tabıǵı monopolııalar jáne ishki ister organdarynyń qyzmetkerlerine turǵyn úı tólemderin berý týraly keıbir zańnamalyq aktilerge ózgerister men tolyqtyrýlar engizý týraly zań jobasyn Májiliske joldady. Osy qujatta memlekettik ınspektorlarǵa qaýipsizdik erejesin óreskel buzǵan kásiporyndardyń qyzmetin toqtatý quqyǵyn berý týraly norma qarastyrylǵan.
Naqtyraq aıtsaq, zań jobasynda Azamattyq qorǵanys týraly zańnyń 39-babynyń 4-tarmaǵyna jańa norma engizilmek. Bul norma boıynsha ónerkásiptik qaýipsizdik salasyndaǵy memlekettik qadaǵalaýshy ınspektor adamdardyń ómiri men densaýlyǵyna qaýip tóngen shetin jaǵdaılarda sot sheshiminsiz qaýipti óndiris nysanyn, tehnıkalyq qurylǵylardy paıdalanatyn jeke kásipkerler men uıymdardyń jumysyn 3 kúnnen aspaıtyn merzimge ýaqytsha toqtatýǵa nemese jabýǵa quqyly. Biraq isti osy ýaqyt ishinde sotqa joldaýǵa mindetti. Tótenshe jaǵdaılar mınıstri Iýrıı Ilın osy normanyń naqty qalaı oryndalatynyn túsindirdi.
«Bul jerde jemqorlyq táýekelderin boldyrmas úshin óndiristi toqtatý nemese jabý týraly sheshim qabyldaı alatyn ınspektorlyq quramnyń ókiletin jiliktep kóresttik. Qandaı jaǵdaı bolsa da, ınspektor 3 kún ishinde ári qaraı sheshim qabyldaý úshin materıaldy sotqa ótkizý kerek. Kásiporynnyń jumysyn toqtatýǵa nemese tolyq jabýǵa adamdardyń ómiri men densaýlyǵyna tikeleı qaýip tóngeni sebep bolady. Bul jerde kásiporyn qyzmetkerlerine de, úshinshi tulǵalarǵa da qaýip tónbeýi kerek. Sol úshin «ýaqytsha jabý», «ýaqytsha qyzmetin toqtatý», «tótenshe jaǵdaıdyń táýekelin joıý múmkindigi» degen uǵymdar qoldanysqa enedi. Qaýipti joıý múmkin bolmaǵan jaǵdaıda kásiporynnyń qyzmetine tolyq tyıym salynady», dedi mınıstr.
Zań jobasyn daýysqa salǵan depýttar qujatqa birneshe túzetý engizip, Májiliske jiberý týraly sheshim qabyldady.
