Basshı aýyly – Almaty oblysynyń Kerbulaq pen Panfılov aýdandarynyń shekarasyna ornalasqan óńir. Ákimshilik bólinisi jaǵynan Kerbulaq aýdanyna qaraıtyn okrýgte 3 myńnan asa turǵyn bar. Basshıdegi aýrýhana osy aýmaqtaǵy úsh aýyldyń adamyna medısınalyq qyzmet kórsetedi. Ortalyqtan shalǵaıdaǵy barlyq aýylǵa tán másele bul mańǵa da jat emes. Ásirese kadr tapshylyǵy qatty seziletinin aıtýymyz kerek. Búginde aýyldyq aýrýhanada joǵary bilimdi eki maman dáriger ǵana jumys isteıdi eken. Orta býyn medısına qyzmetkerlerine de suranys bar. Jumys izdep kelgen jastar kóbine qaıtadan qala jaǵalap ketedi eken. Aýrýhana basshylyǵy Lázzat apaıdy bosaǵan orynǵa attaı qalap, medbıkelik jumysyn jalǵastyrýǵa shaqyryp alypty. Tájirıbeli mamanǵa áriptesteri de, dertine shıpa izdegen naýqastar da dán rıza.
Apaı Aýǵan soǵysyna qatysty estelik aıtýǵa asa yqylasty emes eken. Sanany syzdatatyn oqıǵany qaıta jańǵyrtý aýyr bolsa kerek. Ári ol zamanda medısına mamandyǵynda oqyǵandar úshin áskerı mindetin atqarý paryz bolǵan. Medýchılısheni aıaqtap, eńbekke aralasqan Lázzat Sarjanovany da soǵys órti órship turǵan Aýǵan eline sol mindet jetelep aparypty. Alǵashynda keıipkerimizdi áskerı komıssarıat Polshadaǵy áskerı kontıngentke qyzmet etýge shaqyrady da, keıinnen Aýǵanstanǵa jiberedi. Bul – 1986 jyly bolǵan jaǵdaı. Azdaǵan daıyndyqtan keıin bir top medbıke mingen ushaq ataqty Bagram áýejaıyna qonady. Bul jaqta qııankeski urys bolmasa da, oqtyn-oqtyn atys qarýynyń daýysy estilip turatyn.
– Sol jyly kúzde aıaq asty atys bolyp ketti de, áýeden mına jaýǵan shabýyldyń astynda qaldyq. Jaralanǵan adamdar kóp boldy. Bir jas jaýyngerdiń aıaǵyn julyp ketken eken, jarasyn tańyp, qanyn ázer toqtattym. Baıǵus jigittiń kózindegi úreı men ómirge degen qushtarlyqtyń arpalysqanyn kórip, denem túrshikti. Baǵymyzǵa qaraı, bizdiń tobymyz túgelimen mindetin ótep, aman saý qaıtty, – deıdi medbıke.
Lázzat Ilııasqyzy adam ómirine arasha turýǵa bergen sertinen aınymaı, medbıkelik jumysyn beıbit kúnde de jalǵastyrdy. 1993 jyly osy Basshı aýylynyń azamatymen otaý quryp, ortalyqtan alystaǵy óńirge keldi. Sodan beri tapjylmaı aýyldyq aýrýhanada eńbek etti. Zeınetke shyqqan soń ornyn jastarǵa bergen. Keıinnen qyzmetker jetispeı, bas dáriger qaıtadan aýrýhanaǵa shaqyryp, jumys isteýge kóndiripti. Qazir qoly jeńil medbıkeni aýmaqtaǵy aǵaıyn qurmettep, izdep kelip alǵys aıtatyn bolǵan.
Aýyl turǵyndarynyń alǵysyna bólengen medbıkeni búkil aýdan biledi. Aýǵanstandaǵy áskerı qyzmeti úshin birneshe jaýyngerlik medalmen marapattalǵan. Eńbektegi jetistigi elenip, «Kerbulaq aýdanynyń qurmetti azamaty» ataǵyn alǵan. El-jurtqa syıly, áýletine aıaýly. Dańqty medbıke búginde aýyldyq aýrýhanaǵa joldamamen kelgen jas mamandarǵa aqylshy ustaz da bolyp júr. О́ńirdegi el ómiriniń bir jarqyn sáti osyndaı jandarmen nurly ekeni daýsyz.
Almaty oblysy
