Qazaqstan • 05 Naýryz, 2021

Aýyldarda turǵyn úı salyna bastaıdy

13 ret kórsetildi

2020 jyly respýblıka boıynsha 15,3 mln sharshy metr turǵyn úı salynyp, 140 myńnan astam páter paıdalanýǵa berilgen. Baspana qurylysyna ınvestısııalar 2019 jylmen salystyrǵanda 33,6 paıyzǵa ósip, 2 trln teńgeni qurapty. Onyń ishinde 9,6 myń birlik arendalyq, 18,4 myń birlik kredıttik baspana salynǵan.

Indýstrııa jáne ınfraqurylymdyq damý vıse-mınıstri Qaıyrbek О́skenbaevtyń aıtýynsha, Úkimet Ulttyq bankpen birlesip áleýmettik-kredıttik turǵyn úı salý jáne «Otbasy bank» arqyly «5-10-20» sharttary boıynsha kezekte turǵan adamdarǵa  kredıt berý úshin 390 mlrd teńge bólgen. Qosymsha «Jumyspen qamtý jol kartasy» sheńberinde jobalardy damytý úshin shamamen 1 trln teńge bólingen.

– «Bıznestiń jol kartasy» jáne «Qarapaıym zattar ekonomıkasy» baǵdarlamasyna qatysý úshin shekteýler alynyp tastaldy. Bul sharalar qurylys kompanııalarynyń kásipkerlik belsendiligin jáne halyqtyń jumyspen qamtylýyn qamtamasyz etýge múmkindik berdi. 2020 jyldyń qorytyndysy boıynsha qurylys ekonomıkadaǵy jetekshi salalardyń birine aınaldy. JIО́-degi qurylys úlesi 5,9 paıyz boldy. Respýblıka boıynsha qurylys jumystarynyń kólemi 4,9 trln teńgege oryndaldy. Bul 2019 jylmen salystyrǵanda 11,2 paıyzǵa artyq, – deıdi mınıstrdiń orynbasary vedomstvonyń alqa otyrysynda sóılegen sózinde.

Bıyl barlyq qarjylandyrý kózderi esebinen 17 mln sharshy metr turǵyn úı salý josparlanyp otyr. Bul – 163 myń páter. Kezekte turǵan 31 myńnan astam adam memlekettik ınvestısııalar arqyly qamtylmaq.

– Kredıttik turǵyn úı qurylysy boıynsha ákimdikter aınalymynda 387 mlrd teńge bar. Qurylys kólemin ulǵaıtý úshin biryńǵaı operator naryqtyq sharttarmen qosymsha 61,5 mlrd teńge tarta alady. Bul jergilikti ákimdikterdiń jyldyq 4,25 paıyz mólsherinde oblıgasııalar satyp alýyna múmkindik bermek. О́z kezeginde bul bastama qarajat aınalymyn 448,5 mlrd teńgege arttyryp, 2,5 mln sharshy metr turǵyn úı nemese 41,5 myń kredıttik páter salýǵa múmkindik beredi. Jalpy, bıyl naryqtyq sharttarmen 300 mlrd teńge tartý josparlanyp otyr, – dedi О́skenbaev.

Áleýetti ınvestorlar retinde ishki jáne reseılik naryqtardaǵy kommersııalyq bankter, saqtandyrý jáne qarjy uıymdary qarastyrylyp otyr eken. Mınıstrdiń aıtýynsha, birinshi toqsanda Eýrazııalyq damý bankimen jáne Sberbankpen kelissózder aıaqtalady. Sondaı-aq «Otbasy banki» negizinde turǵyn úımen qamtý ortalyǵy qurylady. Ortalyq jeke tulǵalardyń derek qorlarymen ıntegrasııalanady.

Qaıyrbek О́skenbaevtyń sózinshe, turǵyn úı kezegine turatyn azamattar sany jyl saıyn orta eseppen 50 myńǵa ósip otyr. Búgingi kúni 548 myń adam kezekte tur. Olardyń máselesin eki tetik negizinde sheshý usynylady deıdi. Birinshisi – tabysy eń tómengi kúnkóris deńgeıinen tómen otbasylardy jeke jalǵa beriletin turǵyn úıdi sýbsıdııalaý arqyly turǵyn úımen qamtamasyz etý. Ondaı otbasylarǵa jetim balalar, I, II toptaǵy múgedekter, kópbalaly otbasylar jáne múgedek balasy bar otbasylar, halyqtyń ózge de áleýmettik álsiz toptary jatady. Ekinshisi – tabysy eń tómengi kúnkóris deńgeıinen joǵary otbasylardy jańa turǵyn úıge jeńildetilgen zaımdar berý arqyly turǵyn úımen qamtamasyz etý. Ondaı otbasylarǵa memlekettik qyzmetkerler, bıýdjet qyzmetkerleri, tolyq emes jáne kópbalaly otbasylar, ózge de kezekte turǵandar jatady.

Mınıstrlik ókili aýylda turǵyn úı salý tetigi de usynylyp otyrǵanyn málimdedi.

– Memleket basshysynyń tapsyrmasyna sáıkes aýyldarda jumyskerler úshin turǵyn úı salý kezinde jumys berýshiniń shyǵyndaryn 50 paıyzǵa deıin sýbsıdııalaýdy kózdeıdi. Turǵyn úı saıasatynyń jańa tásilderin iske asyrý maqsatynda qoldanystaǵy zańnamaǵa qajetti ózgerister men tolyqtyrýlar engizý pysyqtalyp otyr, – deıdi О́skenbaev.

Vıse-mınıstr «Nurly jer» baǵdarlamasy sheńberinde halyqty aýyz sýmen qamtý sharalarynyń da belsendi júrgizilip jatqanyn aıtady. 2020 jyly óńirlerde 113 mlrd teńgege 300-den astam joba iske asyrylǵan. Bul qala halqynyń ortalyqtandyrylǵan sýmen qamtamasyz etý deńgeıin 97,5 paıyzǵa, aýyl halqyn 90,1 paıyzǵa deıin arttyrmaq.

– Jyldyń qorytyndysy boıynsha sýmen jabdyqtaý qyzmetine respýblıka halqynyń 94,6 paıyzy qol jetkizedi. 4500 shaqyrym sý qubyry jáne káriz jelileri salyndy. Bıyl sýmen jabdyqtaý jáne sý burý júıelerin damytý boıynsha 125 mlrd teńgege 319 joba iske asyrylyp jatyr. Osy jobalardy iske asyrý esebinen sýmen jabdyqtaý qyzmetterine qoljetimdilikti qamtamasyz etý kórsetkishin qala halqy úshin 98, aýyl halqy úshin 91,8 paıyzǵa jetkizý josparlanǵan, – dedi О́skenbaev.

 

Sońǵy jańalyqtar

Ulttyq úrdister úzilmeıdi

Qazaqstan • Keshe

Mereıimizdi ósirgen megajoba

Rýhanııat • Keshe

Pnevmonııadan 5 adam qaıtys boldy

Koronavırýs • Keshe

Kıik múıiziniń 293 danasy tárkilendi

Oqıǵa • 10 Sáýir, 2021

Ortalyq memlekettik arhıvke jańa basshy keldi

Taǵaıyndaý • 10 Sáýir, 2021

Pnevmonııadan 1 naýqas qaıtys boldy

Koronavırýs • 10 Sáýir, 2021

Uqsas jańalyqtar