Kórmeniń ashylý saltanatynda «Abylaı han mýzeı kesheniniń» dırektory Aıan Sadaev sóılep, Álıhan Bókeıhannyń qazaq halqynyń tarıhyndaǵy orny týraly baıandap, jyljymaly mýzeıge qoıylǵan eksponattar árbir kórermenge ult kósemi týraly tanymdy molaıta túsetinin aıtty. Osydan keıin saltanatta M.Qozybaev atyndaǵy Soltústik Qazaqstan ýnıversıtetiniń tarıh jáne áleýmettik gýmanıtarlyq pánder kafedrasynyń meńgerýshisi Nurbolat Ábýov sóılep, jınalǵandarǵa Álıhan Bókeıhannyń tarıhı eńbekteri týraly birshama maǵlumattar berdi. Sóz berilgende biz de Álıhannyń jýrnalıstik eńbegi týraly baıandap, onyń «Stepnoı kraı», «Orys-Sibir geografııalyq qoǵamynyń basylymdarynda qazaq halqy týraly kóptegen málimetter jazyp, orys oqyrmandaryna ultynyń ádebıeti men ónerinen mol maǵlumattar berip turǵany týraly aıttyq. Al jas aqyn Dıas Aıaǵan Álıhanǵa arnaǵan óleńin oqydy.
Mýzeıde Álıhan Bókeıhannyń Sankt-Peterbýrgtyń ımperatorlyq orman sharýashylyǵy ınstıtýtyn bitirgen attestatynyń kóshirmesi de bar eken. Qazaq dalasynan kelgen jas jigit eki-aq sabaqtan tórt alypty, qalǵanynyń bári bes eken... Basqa qujattardyń da mańyzy zor. Sonyń ishinde «Orys –Sibir geografııalyq qoǵamynyń» gazetine uly Abaıǵa jazǵan qazanamasynyń da túpnusqasynyń kóshirmesi tur. Orys oqyrmandary túgil qalyń qazaq ta bile bermeıtin derekter bul uzaq qazanamanyń óne boıynan oryn alǵan. Bir sózben aıtqanda Álıhan Bókeıhan týraly kórermenderge berer deregi mol.
QYZYLJAR
