«Áıelder kásipkerligin damytý jónindegi resýrstyq ortalyqtar Qazaqstannyń 17 óńirinde paıda bolady. Osy maqsatta Ulttyq ekonomıka mınıstrligi, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa jáne «Atameken» UKP arasynda úshjaqty memorandým jasaldy. Meniń oıymsha, bul áıelderdiń óz múmkindikterin júzege asyrýǵa kómektesetin óte mańyzdy bastama. Resýrstyq ortalyqtyń maqsaty - aqparattandyrý ǵana emes, jobalardy naqty qoldaý jáne súıemeldeý», dedi oblystyq isker áıelder keńesiniń tóraıymy Natalıa Býlatova.
QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanovanyń aıtýynsha, resýrstyq ortalyqtarda áıelder bıznesin damytýǵa baǵyttalǵan zertteý, marketıng, oqytý jáne basqa da is-sharalar ótkiziledi.
Sonymen qatar, saraptamalyq otyrysta «Otbasy bankiniń» áıelderge arnalǵan ıpotekalyq kredıtteý baǵdarlamasyn júzege asyra bastaǵany týraly áńgime boldy. «Baǵdarlamany iske asyrýǵa «Azııa damý banki» qaryzǵa 38 mlrd teńge kóleminde qarjy usynyp otyr. Osy qarajat esebinen biz ózine nemese balalaryna turǵyn úı satyp alǵysy keletin 3 970 áıeldi qarjylandyrýdy josparlap otyrmyz», dedi «Otbasy bank» AQ-nyń Basqarma tóraıymy Lázzat Ibragımova.
