Batýhan Baımen óz shyǵarmashylyǵynda máńgilik qundylyqtarǵa úndeý jasaıdy, qamtıtyn taqyryptarynyń aýqymy keń. Tek elimizde ǵana emes, alys shetelderdegi óner súıer qaýym da onyń qoltańbasyn erekshe baǵalaıdy. Sýretshi Qazaqstannyń kóne jáne jańa tarıhyna toqtala otyryp, týyndylarynda ejelgi túrkilerdiń tarıhyn, kóshpendiler álemin, sondaı-aq adam men onyń ómiri jáne taǵy kóptegen taqyryptardy beıneleıdi. Shyǵarmalarynyń ózindik qurylymyn metaforalyq, sımvolıkalyq nemese allegorııalyq sıýjettermen jasaıdy. Sóıtip, ár taqyrypqa erekshe kórkem-beınelik til tabady. Mysaly, «Túrkiler» (2015), «Kóshpendiler», «Uly dala», «Abylaı hannyń túsi», «Sońǵy oıyn», «Toqyraý» (2018), «Zulmat», «Umaı ana», «Ospan batyr», Sońǵy Nomad (2019), «Ataq qýalaý», «Jeńimpaz», «Tabyný», «Samǵaý» (2020), «Ań stıli» (2021) toptamalarynda ol dramalyq oqıǵalar men ashy shyndyqqa toly álemge qaraıtyn baqylaýshynyń ótkir, sezimtal jáne aqyldy kózqarasyn beıneleıdi. Árbir paraq kompozısııalyq qurylymy jaǵynan úılesimdi, mazmuny turǵysynan tereń maǵynaǵa toly, olarda halyqtyń rýhy bar. Sonymen qatar sýretshi Abaı Qunanbaev, Shyńǵys Aıtmatov, Álisher Naýaı shyǵarmalaryna kóńil bólip, túrki halyqtary fılosofııasynyń biregeıligin zerdeleıdi.
Sýretshi shyǵarmashylyǵynda zamanaýı beıneleý ónerindegi jańa tendensııalardy ustana otyryp, ata-babalarymyzdyń kóshpeli mádenıetiniń baǵa jetpes murasynan shabyt alady. Onyń grafıkalyq týyndylary aýqymdylyǵymen, oı kemeldiligimen, biregeı dala boıaýymen erekshelenedi. Kórmege sýretshiniń 77 grafıkalyq jumysy qoıylǵan. Bul jańa jumystar men sońǵy onjyldyqtaǵy tańdaýly týyndylar, – deıdi kórme jetekshisi, ónertanýshy Samal Mamytova.
Baımen Batýhan Ábdikerimuly 1955 jyly 17 tamyzda Ońtústik Qazaqstan oblysy, Túlkibas aýdany, Abaı aýylynda dúnıege kelgen. 1977 jyly Shymkent pedagogıkalyq ınstıtýtynyń kórkemsýret-grafıka fakýltetin támamdady. О́z eńbek jolyn Á.Qasteev atyndaǵy kórkemsýret kolledjinde muǵalim bolyp bastap, búginde Ońtústik Qazaqtan óńirinde túrli laýazymdy qyzmetter atqaryp, jemisti eńbek etip keledi. 1989 jyldan KSRO Sýretshiler odaǵynyń múshesi. Ol kóptegen respýblıkalyq, odaqtyq, halyqaralyq kórmelerdiń qatysýshy. Sýretshiniń jeke kórmeleri elimizdiń iri qalalarynda, sonymen qatar Germanııa, Túrkııa, Qyrǵyzstan, О́zbekstan, Kıpr memleketterinde ótti.
ALMATY
