Bul náreste 3 naýryz kúni dúnıe esigin ashqan bolatyn. Ol anasynyń qursaǵynda jatqan kezde-aq, bet-jaq bóliginde kinárat bar ekeni belgili bolǵan. Arnaıy mamandar qarap, qatty tańdaıdyń bir jaqty sańylaýy dıagnozyn qoıǵan eken.
Sábı dúnıege kelgennen keıin anasyn embeı turyp, ortodonttyń keńesimen jedel operasııa jasaý usynylǵan. Jańa týǵan shaqalaq birden Almaty qalasy Balalar shuǵyl medısınalyq járdem ortalyǵyna neonataldy hırýrgııanyń jansaqtaý bólimshesine aýystyryldy. Tekseristen ótkennen keıin, birden otaǵa daıyndyq júrgizildi.
Operasııany medısına ǵylymdarynyń doktory, professor Serik Baltashuly Nuǵmanov jasady. Mundaı kúrdeli ota – balanyń emýine kedergi jasap, aýyz qýysyn jaýyp turǵan isikti alyp tastaý úshin qajet edi.
Operasııa kezinde isik joǵarǵy jaqtyń alveolıarly ósindisinen shyqqany belgili boldy. Ota sátti ótti. Búgingi kúni balanyń jaǵdaıy qanaǵattanarlyq. Aıta keterlik jaǵdaı, 2019 jyldan beri Ortalyqta «bet-jaq hırýrgııasy» profıli jumys jasaıdy. Jyl saıyn ortalyqtyń bet-jaq hırýrgııa mamandary kómektesetin joǵarǵy mamandandyrylǵan kómek túrleri artyp keledi. Ortalyq hırýrgtarynyń jas pasıentterdiń densaýlyǵyn saqtaýǵa qosqan úlesi óte zor. Hırýrgtar biregeı operasııalardy sátti jasaıdy. Dárigerlerdiń biliktiligin arttyrý úshin Ortalyq ákimshiligi osy baǵytta mamandandyrylǵan álemniń jetekshi klınıkalarymen yntymaqtastyq ornatqan. Mamandar jyl saıyn sheteldik oqýǵa baryp tájirıbe almasady,sonymen qatar elimizde bet-jaq hırýrgııasynyń negizgi mektebin qurýda úlken jumystar atqaryp otyr.
