JOL QYSQARDY, ELORDA JAQYNDAI TÚSTI

ASTANA MEN PAVLODARDYŃ ARASYNDA  №802/801 JÚRDEK POIYZY JÚITKITIN BOLDY Buǵan deıin osy eki aralyqqa júrdek poıyzdar júrgizýdiń máselesi birneshe jyldarǵa sozylǵany belgili. Bul poıyzdy áne júrgizemiz, mine júrgizemiz degen sol kezderdegi oblys ákimderi de, temir jol basshylary da aýysyp úlgerdi. Múmkin, kim biledi, bir sebepteri de bolǵan shyǵar. Oblys ákimi Baqytjan Saǵyntaev pen “Qazaqstan temir joly” ulttyq kompanııasynyń prezıdenti Asqar Mamınder osyndaı túıindi máseleni sheshýge kelgende ýáde údesinen shyqty. Oblys ákimdigi men ulttyq kompanııa arasyndaǵy eki jaqty memorandým da óz sharttaryn oryndady degen sóz. Sóıtip, tuńǵysh  júrdek poıyz jolǵa shyqty. Ishki qurylymyn aıtpaǵannyń ózinde, syrtqy kórinisi kóz tartarlyqtaı sý jańa poıyz vagondary jolaýshylar úshin tańqalarlyqtaı áser qaldyrýda. Teledıdardan kóretin jańa zamannyń júrdek poıyzdaryna endi ózderi jaıǵasyp Astanaǵa baratyndaryna jolaýshylar da qýanyshty. Júrdek poıyzdyń vagondary Reseı elinen satyp alynypty. Poıyzdar ázirshe aptasyna eki ret júredi. Astanadan juma, jeksenbi kúnderi jolǵa shyǵady. Burynǵydaı tań atqansha júrip barmaı, jańa poıyz endi eki aralyqty 6 saǵat 29 mınót ýaqytta júrip ótedi. Shapshańdyq saǵatyna 130 shaqyrym bolady. Bılet quny da qymbat emes – 1500 teńgeniń ar-jaq ber-jaǵynda ala ala­syz. Aldaǵy kúnderi Astanaǵa qaraı alyp-ushyp baratyn júrdek poıyzdyń júrý kestesi  anyqtalyp, jolaýshylar talaby zerttelip, naqtylanady. Saryarqanyń keń dalasyn basyp ótetin júrdek poıyzdyń  úrdisinen qalmaýǵa asyqqan, Astanaǵa jyldam jetýge jolǵa shyqqan kerekýlik jolaýshylar da kóp. Sátti sapar bolsyn! Farıda BYQAI. PAVLODAR.