Oblystyq tótenshe jaǵdaı qyzmeti qyzyl sýdan keletin qaýiptiń aldyn alýdy qazirden bastap qolǵa alyp jatyr. Qamdanǵan qapy qalmaıdy, bıyl bıýdjetten tótenshe jáne shuǵyl shyǵyndarǵa arnalǵan qorǵa 814 mln 330 myń teńge bólindi. Qalalyq, aýdandyq ákimdikter 9 myń tonnadan astam ınertti materıaldar men 52 myńnan astam qum qaptaryn daıyndap qoıdy. Tótenshe jaǵdaı qyzmetiniń 162,9 tonnadan astam janar-jaǵarmaı qory bar. Tasqyn sýdyń aldyn tosyp, arnasyna qaıta túsirý úshin 7 aýdandaǵy ózenderde muz jarý jumystaryn iske asyrý josparlanǵan. Oblysta naýryz aıynan bastap qardyń qalyńdyǵy men sý tasqyny bolýy yqtımal aýmaqtardaǵy jaǵdaıdy baqylaýda ustap otyratyn ǵaryshtyq monıtorıng júrgizile bastady.
«Qazgıdromet» fılıalyna qarasty gıdrometeorologııalyq baqylaý jáne monıtorıng bóliminiń bastyǵy Nına Vıtkalovanyń aıtýynsha, taıaýda Tobyl, Obaǵan, Qarasý jáne Tintýir ózenderiniń boıynda qar quramyndaǵy sý mólsherin anyqtaý jumystary júrgizilgen.
– Tintýir ózenindegi qardyń quramynda 45 mm sý qory bar, bul qalypty normanyń 72%-yn quraıdy. Meńdiqara, Áýlıekól jáne Jitiqara aýdandaryndaǵy 18 meteostansada sý mólsheriniń shamadan artyq ekeni anyqtaldy. Máselen, Meńdiqara aýdanyndaǵy Mıhaılov aýylynyń mańynda ylǵal mólsheri 67 mm bolý kerek. Al bizdiń mamandar bul óńirdegi ylǵal 130 mm ekenin anyqtap otyr, – dedi Nına Vıtkalova.
5 aqpannan beri aýyl-aýyldy aralaýǵa shyqqan TJD qyzmetkerleri men qala jáne aýdan ákimdikteriniń ókilderi turǵyndarǵa ýaqtyly qar shyǵarý, sý arnalary men aryqtardy tazartý jaıyn eskertip, sý tasqyny bola qalǵan jaǵdaıda qandaı amal jasaý kerektigin túsindirýde. Qutqarý qyzmeti ókilderiniń aıtýynsha, qyzyl sýdan qaýip tóngen eldi mekenderdegi turǵyndar evakýasııalanyp, qoradaǵy mal qaýipsiz aımaqqa shyǵarylady.
– Evakýasııalanǵan azamattardy sý basý qaýpi bar aımaqtan tys jerlerge ornalastyrý úshin 192 ýaqytsha pýnkt daıyndap qoıdyq. Qaýipti aımaqta qalǵan eldi mekenderge azyq-túlik jetkizý jóninde nıet-sharttar jasaldy. Qajet bolǵan jaǵdaıda evakýasııalanǵan turǵyndar ornalasatyn jaılar, úı janýarlaryn aıdap aparatyn oryndar anyqtaldy. Aımaqta kóktemgi sý tasqynyna qarsy kúres sharalaryn júzege asyratyn 1085 tehnıkasy, 116 qaıyǵy, 365 sý sorǵysy, 269 motopompasy bar jalpy sany 2 960 adamnan turatyn arnaıy qutqarý toby jasaqtaldy, – dedi Tótenshe jaǵdaı departamentiniń bastyǵy Birjan Kárimov.
Departament basshysynyń aıtýynsha, sý tasqyny kezeńinde tótenshe jaǵdaı qyzmeti men barlyq azamattyq qorǵanys qyzmetteriniń apatqa qarsy birlesken shtaby jumys isteıtin bolady.
Qostanaı oblysy
