Qoǵam • 14 Naýryz, 2021

SIM 33 myń qazaqstandyqtyń elge oralýyna qolushyn tıgizdi

Osydan bir jyl buryn koronavırýs ınfeksııasy taralǵan alǵashqy kúnderi-aq Syrtqy ister mınıstrligi sheteldegi azamattarymyzdyń ómiri men densaýlyǵyn qorǵaý úshin túrli baǵyttarda eńbek etti, dep habarlaıdy Egemen.kz

Aıym DÁÝIT

Mınıstrliktiń baspasóz qyzmeti pandemııa kezeńinde atqarylǵan jumysty baıandady.

Atap aıtqanda, Qazaqstan azamattaryna konsýltatıvtik kómek kórsetý úshin syrtqy saıası vedomstvo janynan jedel shtab quryldy, ol táýlik boıy elektrondyq poshtaǵa jáne jedel jeli telefondaryna kelip túsetin saýaldardy qarastyrdy.

Shtabtaǵy jedel jeliniń úsh nómiri de – 72-00-46, 72-00-47, 72-05-49 jáne covid19@mfa.kz. elektrondy poshtasy áli jumys istep tur.

«QR SIM ortalyq apparaty men shet elderdegi mekemeler qyzmetkerleriniń úılesimdi jumysy arqyly 2020 jylǵy 2 aqpannan bastap qazirgi kúnge deıin álemniń 72 elinen 33 myńnan astam QR azamatyn elge qaıtarýǵa járdem kórsetilgen. Osy maqsatta 424 charterlik, arnaıy jáne turaqty avıasııalyq, avtobýs jáne parom reısteri paıdalanyldy. Densaýlyq saqtaý mınıstrligimen jáne Qorǵanys mınıstrligimen birlesip, aýyr syrqattanǵan qazaqstandyqtardy sanıtarlyq jáne áskerı-kólik avıasııasymen jetkizýge kómek kórsetildi», delingen mınıstrlik habarlamasynda.

SIM kórshiles memleketterdiń azamattary úshin Qazaqstan arqyly tranzıttik dálizge (temirjol jáne avtobýs kóligimen) ruqsat berýdi turaqty túrde uıymdastyrdy. Shet memleketterge olardyń azamattary úshin repatrıasııalyq áýe reısterin júrgizýge jáne Qazaqstan aýmaǵynan gýmanıtarlyq júkti tasymaldaýǵa kómek kórsetildi.

Mysaly, QR SIM kómegimen elimizdiń aýmaǵy arqyly 40 myńnan astam О́zbekstan azamaty, 13 myńnan astam Qyrǵyzstan azamaty jáne 3 myńnan astam Tájikstan azamaty tasymaldanǵan.

«SIM qyzmetindegi bólek blok retinde – sheteldik áriptesterimizdiń gýmanıtarlyq kómekterin jetkizý, tájirıbe almasý úshin densaýlyq saqtaý salasyndaǵy sheteldiń jetekshi mamandarymen beınekonferensııa jasaý máseleleri turdy. Sondaı-aq, syrtqy saıası vedomstvonyń qyzmetkerleri otandyq medısına qajettilikteri úshin belgili bir dári-dármek pen arnaıy jabdyqtardy jetkizý boıynsha sheteldik seriktestermen kelissózder prosesine tikeleı qatysty. Mınıstrlik múddeli memlekettik organdarmen birlesip TJ rejımi kezeńinde QR Memlekettik shekarasyn kesip ótý tártibiniń jobasyn ázirledi. Eldegi tótenshe jaǵdaı rejımi aıaqtalǵan soń «2020 jylǵy 11 mamyrdan bastap karantın sharalary kezeńindegi QR Memlekettik shekarasyn kesip ótý tártibi» pysyqtalyp, qabyldandy», deıdi mınıstrlik.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz