Mádenıet jáne sport mınıstrliginiń bastamasymen júzege asqan áleýmettik mańyzy zor qaıyrymdylyq jobasy aıasyndaǵy is-sharalardy tamashalaýǵa kóp balaly otbasylardyń baldyrǵandary shaqyryldy. Mádenıet jáne sport mınıstri Aqtoty Raıymqulova málimdegendeı, jańa joba Kórisý kúniniń tálim-tárbıelik sıpatyn kórsetip, óskeleń urpaqqa ónegesi mol týyndylardy usynady. «Barsha qazaqstandyqtardy ata-babamyzdyń ejelden kele jatqan merekesi – Kórisý kúnimen quttyqtaımyn. Bul mereke – barsha jurt bir-birimen qaýyshyp, jastar úlkenderdiń batasyn alyp, qystan aman-esen shyqqanyn merekeleıtin kún. Biz de búgin ósip kele jatqan jas baldyrǵandarǵa osy dástúrimizdi kórsetýdemiz. Barsha qazaqstandyqtarǵa dúnıe júzinde órship turǵan indetten aman-esen óteıik dep tilegim keledi. Kórisý kúni – dostyqtyń, qaıyrymdylyq pen jaqsylyqtyń merekesi. Sondyqtan búgingi «Dástúrim – asyl qazynam» atty jobany biz kóp balaly otbasylardan shyqqan kishkentaı baldyrǵandarǵa arnadyq», dedi mınıstr.
Joba halqymyzdyń burynnan kele jatqan «Kórisý» dástúrinen bastaý aldy. Kórisý dástúriniń ereksheligi men tárbıelik mánin is-sharaǵa jınalǵan zııaly qaýym ókilderi men qoǵam qaıratkerleri túsindirip, jas baldyrǵandarǵa úlgi kórsetti. Bul merekeni balalardyń kózqýanyshyna aınaldyrý maqsatynda sharaǵa kelgen qonaqtar barsha baldyrǵandarǵa kámpıt, jent, qurt, irimshik syndy ulttyq taǵamdardan turatyn tátti syılyqtar jınaǵyn tabystady. Qonaqtar qatarynda Senat depýtaty Nurtóre Júsip, Májilis depýtattary Bekbolat Tileýhan, Azat Perýashev, Parlament Májilisiniń Áleýmettik-mádenı damý komıtetiniń hatshysy Darhan Myńbaı jáne Aıgúl Múkeı, Maqsat Tolyqbaı syndy belgili telejúrgizýshiler men tanymal blogerler boldy.
«Qazaqkonsert» memlekettik uıymynyń dırektory Jeńis Seıdollaulynyń aıtýynsha, Ulystyń uly kúni balalardyń asyǵa kútetin merekesi bolyp qalyptasý kerek. «Halqymyz burynnan-aq Kórisý kúnin meıirimdilik pen qamqorlyq, birlik pen kelisim syndy máńgilik qundylyqtardy dáripteıtin meıram retinde toılaǵan. Osyǵan oraı, Naýryzdyń bastaýy – Amal merekesinde biz meıirimdilik shýaǵy men júrek jylýyn syılaý dástúrin bastadyq. Búgingi joba sonyń dáleli. Bul joba arnaıy jas baldyrǵandar úshin uıymdastyrylyp otyr. Balalar – elimizdiń bolashaǵy. Naýryz merekesiniń bastaýy osyndaı dástúrge saı toılanyp, balalardyń sanasyna kirikse, naǵyz halyqtyq meıramǵa aınalady», dedi ol.
Konsertte «Astana sazy» memlekettik folklorlyq ansambli men Qurmash Mahan, Ardaq Balajanova, Qumarbek Qalqataı, Dinıslambek Jaılaýbaı, Gúlnár Kóshenova, Birjan Aıtahmetov, Aıdana Qarjaýbaeva syndy belgili ánshiler óner kórsetti. Konserttik baǵdarlamaǵa kórermen súıip tyńdaıtyn halyq ánderi men zamanaýı tanymal týyndylar engen. Merekelik án men kúı shashýdan keıin baldyrǵandar Naýryz kójeden dám tatyp, «Astana mıýzıkl» memlekettik teatry daıyndaǵan «Naýryzbektiń oqıǵasy» ınteraktıvtik ertegisin tamashalady. Zamanaýı formattaǵy qoıylym jas baldyrǵandardyń ulttyq qundylyqtar men folklorlyq muraǵa qyzyǵýshylyǵyn arttyrýǵa baǵyttalǵan.
Joba otandyq anımasııalyq fılmderdiń kórsetilýimen aıaqtaldy. Balalar «QAZAQSTAN» OKZ úlken zalynda «Qazaqfılm» AQ usynǵan «Kúltegin» mýltfılmin tamashalap, kóńildi ýaqyt ótkizdi. Is-shara sońynda balalar men ata-analar uıymdastyrýshylarǵa óz alǵystaryn jetkizdi.
