Saltanatty rásimge oblys ákiminiń orynbasary Baqyt Esimova, ýnıversıtet rektorynyń m.a. Alma Dosjanova, jergilikti kásipker Qaırat Maıshev, bilim ordasynyń ǵalymdary, jýrnalıstıka kafedrasynyń stýdentteri men magıstranttary qatysty.
Atalmysh jýrnal qazaq jáne orys tilderinde shyǵyp turady jáne áleýmettik jelide elektrondy nusqasy jarııalanady. Ýnıversıtet basshysy jınalǵandardy quttyqtap, jýrnal redaksııasy men avtorlarynyń jumysyna sáttilik tiledi.
«Jańa jýrnaldyń mazmuny ári qyzyqty bolýy eń aldymen ózimizge baılanysty. Aldaǵy ýaqytta jýrnaldyń árbir sany shyqqan saıyn sizder usynǵan taqyryptar boıynsha áleýmettik jelidegi óz paraqshamda oı-pikirimdi bildirip otyramyn. Ýnıversıtet byltyr pedagogıka ýnıversıtetimen qosylǵanyn jaqsy bilesizder. Qazir bizde 7 myńnan astam stýdent bilim alady, oqytýshylar men qyzmetkerlerimizdiń sany bir jarym myńnan asyp jyǵylady. Jańa jýrnal shyǵarý týraly bastama osydan bir jyl buryn kóterilgen. Búgin sáti túsip, sizderdi basylymnyń alǵashqy sanymen tanystyryp otyrmyz. Biz 25 jyl boıy jýrnalıst mamandardy daıyndap kelemiz. Búginde bizdiń túlekterimiz elimizdiń kóptegen buqaralyq aqparat quraldarynda jemisti qyzmet etip júr» dedi A.Dosjanova.
Ahań ýnıversıtetinde alǵash jýrnalıstıka kafedrasy ashylǵan soń, bir jyldan keıin, naqtyraq aıtsaq, 1997 jyly bolashaq jýrnalısterdiń teorııalyq bilimin tájirıbemen ushtastyrý maqsatynda «Bilim jarysy» gazeti shyǵa bastady. Odan keıin 2003 jyly belgili jýrnalıst Baıtursyn Ilııas aǵamyz respýblıkalyq «Qostanaı – jas órken» jýrnalyn shyǵardy.
«Búgin, mine, sol basylymdardyń qataryna jańa formattaǵy, qazirgi zamanǵa laıyqty «Univer Life» jýrnaly qosyldy. Bul basylymnyń shyǵýyna negizinen jýrnalıstıka fakýltetiniń oqytýshylary men stýdentteri, ǵalymdary atsalysady. Biz tek qana ýnıversıtet jańalyqtaryn ǵana emes jalpy óńir tynysyn qamtýdy kózdep otyrmyz» dedi jýrnalıstıka kafedrasynyń meńgerýshisi Amangeldi Shórentaev.
Stýdentterdiń jańa basylymy jylyna tórt ret shyǵyp turady jáne oqyrmandarǵa tegin taratylady. Jýrnalda ýnıversıtet tynysy ǵana emes, sonymen qatar otandyq ǵylymdaǵy jańalyqtar men túlekterge jumys beretin kásiporyndar, oblystaǵy suranysqa ıe mamandyqtar týraly mazmundy materıaldar jaryq kóretin bolady.
