«Birinshiden, elde koronavırýs ınfeksııasyn juqtyrǵandar sany ósti. Indet kúrt órshidi. Eki qalada lokdaýn jarııalandy. Ekinshiden, memleket shetelden ushyp kelgen azamattarǵa PTR test jasaý úshin kóp qarajat jumsap jatyr. Sonymen qatar, jolaýshylar test nátıjıesi shyqqansha qonaq úıge ornalastyrylady. Bul qosymsha qaýip týdyrady. Olardyń bireýi ınfeksııa taratýshy bolýy múmkin», deıdi Qazaqstan týroperatorlar qaýymdastyǵynyń prezıdenti Inna Reı.
Onyń aıtýynsha, kóptegen týrıst demalystan PTR test tapsyrmaı keledi. Tipti, keıbireýinen oń nátıje shyǵyp jatyr.
«Bul úlken másele. Týrıster PTR testi nege shetelde ótkizgisi kelmeıdi? Sebebi oń nátıje kórsetse, shetelde qalyp qoıamyz dep qorqady. Bul kóptegen jańa másele týǵyzady. Sondyqtan biz týrısterdi indet juqtyrýdan barynsha qorǵalǵan kýrorttarǵa jiberýge tyrysamyz. Sondaı-aq saqtandyrý bar. Saqtandyrý mindetti túrde týr paketine kiredi», dep qosty spıker.
Sonymen qatar ol QR Úkimeti týrkompanııalardan adamdar elge oralmas buryn PTR testileýden ótýin qamtamasyz etýdi suraǵanyn basa aıtty.
«Biraq biz barlyq jolaýshylardy qamtamasyz ete almaıtynymyz anyq. Qazir jańa qaýlyny kútip otyrmyz. Onda týrıster ushaqqa otyrar aldynda PTR anyqtamasyn mindetti túrde kórsetýi kerektigi aıtylady. Eger jolaýshylarǵa Qazaqstanǵa kelgennen keıin test tapsyrýǵa ruqsat berilse, onda ol aqyly bolady», dep qosty Inna Reı.
