Negizi eldiń 2025 jylǵa deıingi Strategııalyq damý jospary 2018 jyly qabyldanǵan bolatyn. Alaıda pandemııa jahandyq ekonomıkaǵa keri áser etip, elderdiń damý ssenarııine túbegeıli ózgeris engizdi. Ulttyq jospardy qurý osyndaı qajettilikten týyndady.
Strategııalyq josparlaý jáne reformalaý agenttiginiń tóraǵasy Qaırat Kelimbetovtiń aıtýynsha, Ulttyq jospar azamattardyń ál-aýqaty, ınstıtýttardyń sapasy jáne myqty ekonomıka syndy úsh baǵyt boıynsha 10 jalpyulttyq basymdyqtan turady.
– «Ádil áleýmettik saıasat» jalpyulttyq basymdyǵy nátıjeli jumyspen qamtýǵa jáne áleýmettik salamattylyqty qamtamasyz etýge baǵyttalǵan júıeli sharalardy qamtıdy. Bul rette, eńbek naryǵyn qalpyna keltirý, jumyssyzdyq deńgeıin tómendetý úshin tıisti sharalar qabyldanady. Áleýmettik qamsyzdandyrý salasy jańa Áleýmettik kodeksimen rettelmek. Nátıjesinde, jumyssyzdyq deńgeıi 2025 jylǵa qaraı 4,7 paıyzdan aspaıtyn bolady. Memlekettiń áleýmettik tólemder men járdemaqylar boıynsha barlyq áleýmettik mindettemesi tolyq kólemde oryndalady. Inflıasııa deńgeıin eskere otyryp, áleýmettik tólemderdi ındeksteý júrgiziledi, – dedi Q.Kelimbetov.
«Qoljetimdi jáne tıimdi densaýlyq saqtaý júıesi» jalpyulttyq basymdyǵy adamdardyń densaýlyǵyn jaqsartýdy, qoldaýdy jáne qalpyna keltirýdi, sondaı-aq qazirgi jáne bolashaq urpaqtyń ıgiligine yqpal etetin turaqty densaýlyq saqtaý júıesi tujyrymdamasyn damytýdy kózdeıdi. Bul rette, dárigerlerdiń jalaqysyn 2023 jylǵa qaraı 2,5 ese ósirý mindeti tur. Barlyq óńirde 20 zamanaýı medısınalyq ortalyq, Nur-Sultan jáne Almaty qalalarynda eki ǵylymı-ınnovasııalyq kópbeıindi klınıka salynady. Qabyldanǵan sharalardyń nátıjesinde qazaqstandyqtardyń ómir súrý uzaqtyǵy 75 jasqa jetedi.
«Sapaly bilim berý» basymdyǵy básekege qabiletti adam kapıtalyn damytýdy kózdeıdi. Sondyqtan 2023 jylǵa qaraı muǵalimderdiń jalaqysyn eki ese ósirý josparlanýda. 2025 jylǵa deıin elimizde 800 jańa mektep salynady. Bul apatty jáne úsh aýysymdyq mektepterdi joıyp, oryn tapshylyǵy máselesin retteıdi. Budan bólek, Nazarbaev ýnıversıtetiniń tájirıbesi boıynsha 2 jetekshi joǵary oqý orny qurylmaq.
– «Azamattardyń múddesin qorǵaıtyn ádil jáne tıimdi memleket» jalpyulttyq basymdyǵy zańnyń naqty ústemdigin qamtamasyz etýge baǵyttalǵan quqyqtyq negizderdi jetildirýdi kózdeıdi. Nátıjesinde, ekonomıkalyq qyzmetti yntalandyrý, ómir súrý sapasyn jaqsartý jáne azamattar quqyqtarynyń qorǵalý deńgeıin arttyrý úshin jaǵdaılar jasalmaq, – dedi agenttik tóraǵasy.
«Memlekettik basqarýdyń jańa modeli» basymdyǵy halyq pen bıznestiń múddesin qanaǵattandyrýǵa baǵdarlanǵan memlekettik basqarýdyń servıstik jáne «adamǵa baǵdarlanǵan» modelin engizýdi quptaıdy. 2025 jylǵa qaraı memlekettik organdardyń barlyq qyzmeti avtomattandyrylady ári elektrondy formatqa aýystyrylady. Memlekettik apparat pen kvazımemlekettik sektordyń sany 25 paıyzǵa qysqarmaq.
– «Patrıotızm qundylyqtaryn dáripteý» jalpyulttyq basymdyǵy ulttyq biregeılikti saqtaýǵa jáne árbir azamattyń sanasyn jańǵyrtýǵa baǵyttalǵan. Jastardyń ózin ózi tanytýy, qaıyrymdylyq mádenıetiniń deńgeıin arttyrý jaıy qamtylady. «Ulttyq qaýipsizdikti nyǵaıtý» basymdyǵy 2025 jylǵa deıingi Ulttyq qaýipsizdik strategııasy sheńberinde ulttyq múddelerdi tıimdi qorǵaýdy qamtamasyz etedi. Nátıjesinde, qoǵamdyq qaýipsizdik 80 paıyzǵa deıin qamtamasyz etilip, kóleńkeli ekonomıka úlesi 15 paıyzǵa deıin tómendeıdi, – dedi agenttik basshysy.
Ulttyq jospar aıasynda ekonomıkalyq qatynastardyń jańa júıesin qalyptastyrý jaǵdaıynda ártaraptandyrylǵan jáne ınnovasııalyq ekonomıkany damytýǵa baǵyttalǵan qurylymdyq reformalar iske asyrylmaq. Ulttyq ekonomıka mınıstri Áset Erǵalıevtiń málimetinshe, reformalardyń nátıjesinde ekonomıkadaǵy orta kásipkerliktiń úlesi 15 paıyzǵa deıin ósedi. Al shaǵyn jáne orta bızneste jumys isteıtinderdiń sany 4 mln adamǵa deıin kóbeımek.
– Ekonomıkanyń bazalyq salalarynda qosylǵan quny joǵary óndiristi damytý úshin sapaly jańa tásilder iske asyrylady. Ekonomıkany ındýstrııalandyrý jónindegi jumystyń negizgi nátıjesi óńdeýshi ónerkásip óniminiń kólemin 1,5 ese ulǵaıtý bolmaq. Agroónerkásipte negizgi basymdyq aýqymdy jáne keshendi ekojúıelerdi qalyptastyrýǵa arnalady. Osy maqsatta 350 myń fermerlik jáne úı sharýashylyǵyn tarta otyryp, aýyl sharýashylyǵy ónimderin óndirý jáne qaıta óńdeý boıynsha 7 iri ekojúıe qurylady. Aýyl sharýashylyǵynyń jalpy óniminiń kólemi 1,3 ese, qaıta óńdelgen agroónerkásip óniminiń úlesi 70 paıyzǵa deıin ulǵaıady, – dedi Á.Erǵalıev.
Sondaı-aq ekonomıka salalaryn sıfrlandyrý, jasandy ıntellekt jáne Big Data elementterin engizý jumystary jalǵasady. El halqynyń 99 paıyzy sapaly ınternetke qol jetkizip, oblys ortalyqtary men respýblıkalyq mańyzy bar qalalar 5G joǵary jyldamdyqty ınternetpen qamtylady.
– Týrızmdi damytý sharalary onyń úlesin ishki jalpy ónimniń 8 paıyzyna deıin ósirýge múmkindik beredi. Úılestirilgen makroekonomıkalyq saıasat salyq-bıýdjet turaqtylyǵyn saqtaý jáne tıimdi monetarlyq saıasatty iske asyrý, sondaı-aq básekeli jáne tıimdi qarjy naryǵyn damytý esebinen qamtamasyz etilmek. «Ekonomıkalyq jáne saýda dıplomatııasyn belsendi damytý» jalpyulttyq basymdyǵy Qazaqstannyń naqty básekege qabilettiligin arttyrýdy jáne onyń álemdik ekonomıkalyq qoǵamdastyqtyń jaýapty qatysýshysy retindegi mártebesin nyǵaıtýdy kózdeıdi. Syrtqy ekonomıkalyq saıasatta ınvestısııalardy belsendi jáne targettep tartý, sondaı-aq qazaqstandyq eksportty ilgeriletý mańyzdy basymdyqqa aınalady. Osyǵan oraı 2025 jylǵa qaraı tikeleı sheteldik ınvestısııa kólemin 30 mlrd dollarǵa jetkizý josparlanýda. Shıkizattyq emes eksport eki ese, ıaǵnı 41 mlrd dollarǵa ulǵaıady, – dedi Ulttyq ekonomıka mınıstri.
«Teńgerimdi aýmaqtyq damý» jalpyulttyq basymdyǵy óńirlerdiń áleýetin ashýdy jáne olardyń áleýmettik-ekonomıkalyq júıeleriniń básekege qabilettiligin nyǵaıtýdy kózdeıdi. 2025 jylǵa qaraı ýrbanızasııa deńgeıi 62,6 paıyzdy quraıdy degen boljam bar. Sonymen qatar árbir tirek aýylǵa deıingi barlyq respýblıkalyq jáne jergilikti jol qaıta jańartylyp, jóndeledi. 3,5 myńnan astam aýyl jańa óńirlik standarttarǵa sáıkes jańǵyrtylady.
Ulttyq jospar 2025 jylǵa qaraı ekonomıkanyń ósýin 5 paıyzǵa qamtamasyz etpek.
