Esh adamnyń ultyna, senimine qaramaı, qol alysyp qurmet kórsetetin keremet úrdis búginde búkil elimizge tarap ketkeni ras. Ásirese Batys Qazaqstan oblysyndaǵy Qazaqstan halqy Assambleıasynyń músheleri osy merekeni Oral qalasynda mándi, maǵynaly ótkizdi. «Jańa ómir, jańa kúnmen kórisý» atty shara aıasynda oblys ortalyǵynda turatyn eńbek ardagerleriniń úıine baryp, arnaıy sálem bergen bir top jastar dástúrli merekeniń shyǵý tarıhy men jón-jobasyn úlkenderden surap bildi.
Assambleıanyń Oral qalasy shaǵyn aýdandary boıynsha Qoǵamdyq kelisim keńesiniń tóraǵasy Qanat Orazǵalıev aqsaqal aıtýly merekege barynsha daıyndalǵan eken. Ulttyq kıimin kıip, kelgen qonaqtardy qushaq jaıa qarsy alǵan qarııa jastarǵa aq batasyn jaýdyryp, ortaq Otanymyz – Qazaqstan Respýblıkasynda tatýlyq pen dástúr sabaqtastyǵy saqtalsa, elimizdiń bolashaǵy baıandy bolatynyna senetinin aıtty.
Budan keıin jastardy belgili eńbek ardageri, Mustahım Yqsanov atyndaǵy qoǵamdyq qordyń tóraǵasy Asqar Ataev aqsaqaldyń dámge toly dastarqany qarsy aldy. Seksenge kelip qalsa da sergektigin joǵaltpaǵan aqsaqal keıingi urpaqqa úlgi bolatyn ósıetin aıamady.
Assambleıanyń Qoǵamdyq kelisim keńesiniń múshesi, elge eńbegi sińgen matematık-muǵalim Maqsot Rahımberdın áli kúnge deıin balalardy matematıkaǵa jáne shahmattyń qyr-syryna baýlyp keledi. Shańyraǵyna kórise kelgen túrli ult jastaryn qýana qarsy alǵan Maqsot Qýanyshuly «Jańbyrmenen jer kógerer, batamenen el kógerer» degen qazaq naqylynyń mánin túsindirip, kelgenderge shynaıy batasyn berdi.
– Osy sharaǵa qatysqanyma óte qýanyshtymyn. О́zim Hamza Esenjanov atyndaǵy Batys Qazaqstan oblystyq balalar men jasóspirimder kitaphanasynda qyzmet etkendikten, týǵan jerge, Otanǵa degen qurmet bala kúnnen qalyptasatynyn jaqsy bilemin ǵoı. Elge eńbegi sińgen aǵa býynmen jıi kórisý jastarǵa óte paıdaly boldy. Onyń ústine pandemııanyń kesirinen mundaı maǵynaly kezdesýlerge sýsap qalyp edik, – deıdi kitaphanashy, «Kitaphana isiniń úzdigi» medaliniń ıegeri Sergeı Bykov.
