Áleýmettik medısınalyq saqtandyrý júıesiniń basty maqsattarynyń biri – kómek kórsetýdiń qoljetimdiligi men sapasyn jaqsartý. Sondyqtan, MÁMS qarajaty esebinen aýyl halqyna medısınalyq turǵyda kómek kórsetýdi jyljymaly medısına arqyly qolǵa alǵan.
Jaqynda Katonqaraǵaı aýdanynyń aýdandyq aýrýhanasynan aýyldardy aralaýǵa alǵash ret jyljymaly medısınalyq keshenmen jabdyqtalǵan avtobýs shyqty. Olar kún raıynyń kúrt qubylýyna qaramastan, alystaǵy Novo-Polıakovka aýylyna deıin baryp qaıtty.
Avtobýsqa qondyrylǵan mobıldi dıagnostıkalyq medısınalyq ortalyqtyń bir ereksheligi – jyly jáne sýyq jaǵdaılarda jumys isteı beredi. Mundaǵy mamandar kúnine 60-qa jýyq naýqasty medısınalyq tekserýden ótkizýge qaýqarly. Medısına mamandarynyń qatarynda nevrolog, oftalmolog, sanolog, pedıatr, akýsher-gınekolog, zerthanashy, terapevt bar. Salonda gınekologııalyq tekserý úshin de oryn qarastyrylǵan. Máselen, akýsher-gınekolog 25 pasıentti qarap shyqsa, jalpy praktıka dárigeri 52 turǵyndy, nevropatolog 20, pedıatr 6 balany tekserdi. 20 adam sandyq rentgennen, taǵy sonsha adam ýltradybystyq dıagnostıkadan ótti. Kóz janary syr bergen 31 turǵyn okýlıstke qaraldy. Aıtqandaı, halyq áleýmettik medısınalyq saqtandyrý sheńberinde dárigerlik qyzmetterdi tegin aldy.
– Jyljymaly medısınalyq keshen arqyly aýyl turǵyndary tolyq tekserýden óte aldy. Áıtpese, tekserilý úshin 60 shaqyrymdaǵy aýdan ortalyǵyna barýǵa týra keler edi. Ol jaqta uzyn-sonar kezek kútýiń kerek. Ásirese, bul qarttar men balalar úshin qıyn. Jyljymaly keshenniń kelgenine aýyl bolyp qýandyq, – deıdi Novo-Polıakovka aýylynyń turǵyny Zınaıda Prokopevna.
Aıta keterligi, avtobýs lıftimen jáne pandýspen jabdyqtalǵandyqtan, múmkindigi shekteýli adamdarǵa da asa qıyndyq týyndatpady. Katonqaraǵaı ortalyq aýdandyq aýrýhanasynyń bas dárigeri Sáýle Baıgereevanyń aıtýynsha, osydan bylaı jyljymaly keshen aýyldarǵa turaqty túrde baryp turady. Sol maqsatta jyljymaly medısınalyq keshenniń shalǵaı aýyldarǵa turaqty barý kestesi jasaldy.
Shyǵys Qazaqstan oblysy
