Mereke kúnderi «Habar», Kazakh TV telearnalarynda ótetin «Opera túni nemese Naýryz qutty bolsyn» atty taǵy bir aýqymdy joba-konserttiń túsirilimi aıaqtaldy.
«Álemdik klassıka HHI ǵasyrdyń Naýryzymen jarasymdy úılesim tapqan, al nómirlerdiń biregeı jarqyn qoıylymdary jobany tanymal estradalyq shoý sııaqty oıyn-saýyqqa toly jáne qyzyqty etedi. Bizdiń maqsatymyz – kórermenniń joǵary ónerge degen talǵamyn arttyryp, ony otandyq opera jáne balet sahnasynyń úzdik oryndaýshylarymen tanystyrý arqyly merekelik kóńil kúı qalyptastyrý», deıdi «Habar» agenttiginiń mýzykalyq prodıýseri Tatıana Lavrık.
Baǵdarlamanyń júrgizýshileri Andreı Tregýbenko, Tólegen Rahymbaev jáne Olga Spırına teatrdyń konserttik zalynda ǵana emes, sondaı-aq kórermender buryn bolmaǵan: orkestrlik oryn, grımerlik bólmeler men notalyq kitaphanada bolady. Túngi foıede: ataqty «Gákký» ánimen Kúlásh Baıseıitova, Fıgaro arııasyn oryndaǵan Ermek Serkebaev jáne Nemorıno obrazymen Álibek Dinishev syndy tanymal tulǵalardyń portretteri shyrqaıdy, al bul mýzykalyq úzindilerdi teatr solısteri sahnada jalǵastyrady.
«Keıipkerler teatr qabyrǵalarynda Sharl Gýnonyń «Faýst» operasynan Mefıstofel men Djoakkıno Rossınıdiń «Sevıldik shashtarazynan» Fıgarony kezdestiredi. Opera jáne balet trýppasynyń jetekshi solısteri hor ártisterimen birge sımfonııalyq orkestr áýenimen elimizdiń bas teatrynyń úlken sahnasynda eń tanymal arııalar men balet nómirlerin oryndaıdy. Konsertte qazaq jáne sheteldik opera jáne balet klassıkasynyń jarqyn hıtteri shyrqalady. Bul – «Qyz Jibek», «Abaı», «Birjan men Sara», «Sevıldik shashtaraz», «Rıgoletto», «Faýst», «Iolanta» operalarynan jáne «Don Kıhot» baletinen sahnalanǵan kórinister. Mýzykalyq nómirler sahnada jáne teatrdyń úlken zalynda túsirildi. «Lakme» operasynan gúl dýeti áýenimen sahna ústinen áýe gımnastary qalyqtaıdy.
– «Opera túni nemese Naýryz qutty bolsyn» jobasy bizdiń
teatr úshin jańa deńgeı, ol teatrdy basqa qyrynan ashýǵa jáne kórsetýge, sondaı-aq osyndaı qıyn ýaqytta súıikti kórermenmen baılanys ornatýǵa múmkindik beredi. «Habar» telearnasyna osy jobany júzege asyrý múmkindigi úshin zor alǵysymdy bildirgim keledi. Teatr kásibı ujymdardan turady, bul osy jobany joǵary deńgeıde daıyndaýǵa jáne júzege asyrýǵa kómektesti, – deıdi Abaı atyndaǵy QazUAOBT dırıjeri Nurjan Baıbosynov.
Teatrdyń jetekshi ártisteriniń qatysýymen túsirilgen kishigirim sahnalarda mahabbat týraly, Naýryz dástúrleri týraly, óner týraly ázil-qaljyńy aralas qyzyqty dúnıeler aıtylady, olar telekonserttiń sıýjettik jelisine úılestirilgen.
– Túsirilim kúnderi teatrda ǵajaıyp sátti kútetin, keıde mıstıkalyq atmosferany quraıtyn merekelik kóńil kúı ornady. Opera jáne balet teatrynyń ártisteri «Habar» agenttigimen birlesip, qazaqstandyqtar úshin keremet syılyq ázirledi. Sımfonııalyq orkestr, hor, balet ártisteri, opera solısteri kórermenderdi asqaq ónerdiń ǵajaıyp álemi – dybystar men jaryq sheshimderiniń sıqyrly álemine jeteleıdi. Sımfonııalyq orkestrdiń súıemeldeýimen kórermender álemdik jáne Ulttyq opera jáne balet klassıkasynyń eń tanymal týyndylaryn tyńdaı alady. Mýzyka kez kelgen merekeniń jáne bárimizdiń súıikti Naýryzymyzdyń eń tańdaýly syıy bolmaq, – deıdi Abaı atyndaǵy QazUAOBT dırıjeri Erbolat Ahmedıarov,
Jobany júzege asyrý boıynsha shyǵarmashylyq topqa Lev Marıýpolskıı (rejısser), Dmıtrıı Karabeskıı (jaryq sýretshisi) jáne Dmıtrıı Sınelnıkov (dybys ınjeneri) sııaqty tanymal mamandar endi. Baǵdarlama qoıylymynyń rejısseri Natalıa Kagadıı, teletúsirilim kezinde sımfonııalyq orkestrge Nurjan Baıbosynov pen Erbolat Ahmedıarov dırıjerlik etti.
ALMATY
