– Mýzeı qyzmetkerleri 10 naýryzdan beri Naýryzǵa qatysty taqyryptyq is-sharalardy uıymdastyryp, alýan taqyrypty qamtıtyn ekskýrsııalar men dárister, kórmeler, kezdesýler ótkizýde. Aptanyń basynda biz múmkindigi shekteýli balǵyndardy qonaqqa shaqyryp, Ulystyń uly kúnine baılanysty qyzyqty áńgime ótkizdik. Mýzeıdiń bir zalyna kerege quryp, ashyq kıiz úı sııaqty etip, dastarqan jaıyp, balalarǵa ulttyq taǵamdardan dám tatyrdyq, – deıdi mýzeı qyzmetkerleri.
Mýzeıde birneshe kúnnen beri «Uly dalanyń uly meıramy» atty merekelik is-sharalar toptamasy ótip jatyr.
– Ujym bolyp óz kúshimizben ulttyq salt-dástúrlerimiz ben ulttyq oıyndarymyzdy, aıtysymyzdy, án shashýymyzdy aralastyryp teatrlandyrylǵan kórinis daıyndadyq, – dedi mýzeı basshysynyń orynbasary Saltanat О́telbaeva.
Atalǵan ujym bıyl Táýelsizdiktiń 30 jyldyǵy men uly aǵartýshy Ybyraı Altynsarınniń 180 jyldyǵyna arnalǵan kóptegen ıgi jobalardy júzege asyrýdy kózdep otyr. Máselen, mýzeıde Naýryzǵa arnalǵan merekelik sharalar aıasynda «Ybyraı jyly» kúntizbesiniń tusaýy kesildi.
Qostanaı oblysy
