Jambyl oblysynda óz erkimen ótinish bildirgen 4 035 medısına jáne 1 068 bilim salasynyń qyzmetkeri erikti túrde ekpe saldyrǵan. Olardyń qatarynda óńirdiń densaýlyq saqtaý salasynda qyzmet atqaryp júrgen bilikti dárigerlermen qatar, aımaqtaǵy balabaqsha tárbıeshileri, bastaýysh synyp pedagogteri, kolledj muǵalimderi, sondaı-aq bilim basqarmasy men bólimderiniń qyzmetkerleri de bar.
Jambyl oblystyq densaýlyq saqtaý basqarmasynyń basshysy Áset Qalıev búginde óńirde «Spýtnık V» vaksınasynyń 1 komponenti barlyǵy 5 540 adamǵa egilgenin aıtty. Olardyń 72,8 paıyzy medısına qyzmetkerleri bolsa, 19,8 paıyzyn muǵalimder quraıdy eken. Sondaı-aq vaksına saldyrǵandardyń qatarynda Ulttyq qaýipsizdik komıteti men polısııa departamentiniń, áleýmettik mekemelerdiń qyzmetkerleri jáne túrli deńgeıdegi memlekettik qyzmetshiler, stýdentter men taǵy basqa da mamandyq ıeleri bar. Búginde ekpe saldyrǵan pedagogterdiń densaýlyǵy qalypty eken. Vaksınanyń qandaı da bir teris áseri bolmaǵan.
«Ustazdar óz erkimen vaksına alýǵa jazbasha kelisim bergen soń aldymen arnaıy ekpe úshin daıyndalǵan bólmege baryp densaýlyǵyn teksertedi. Onda dene qyzýy men qan qysymyn ólshetedi. Densaýlyǵynda kinárat bolmasa, birinshi dozasyn qabyldaıdy. Keıin 30 mınýt dárigerdiń baqylaýynda bolady», deıdi Áset Qalıev.
Al oblystyq bilim basqarmasynyń basshysy Gúlnár Hodjabergenovanyń aıtýynsha, vaksına alǵannan keıin de pedagogter dárigerlerdiń baqylaýynda bolǵan. О́ńirdegi pedagogterge ekpe týraly túsindirý jumystary júrgizildi. Balalardyń ómiri men densaýlyǵynyń qaýipsizdigi úshin ár muǵalim jaýapty. Sondyqtan vaksına alýdy ár pedagog azamattyq mindeti dep esepteý kerek.
Josparǵa sáıkes, Jambyl oblysy boıynsha bıyl 18 jastan asqan 593 myń 700 adamǵa koronavırýs indetine qarsy ekpe salynady. Bul oblys halqynyń 52 paıyzyn quraıdy. Al keıinnen halyqtyń qosymsha osal toptaryn qosa otyryp, kontıngentti keńeıtý josparlanǵan.
Jambyl oblysy
