Sý tapshylyǵy buryn da, keńes ókimeti kezinde de bolǵan. Sondyqtan baıyrǵy jurt onyń da amalyn tapqan. Ásirese sovet kezindegi sharýashylyq basshylary dástúrli daǵdyǵa súıenip, qysqy qar, kóktemgi sel sýyn barynsha mol jınap alýǵa tyrysatyn. Tabıǵı jer bederin eskerip, qar sýy jınalatyn jerlerdi odan saıyn tereńdetip, sý qoımalary – qaýyzdar qazyldy. Oǵan jınalǵan sý kúzge deıin tórt túliktiń shólin qandyrýǵa jetetin.
- Sońǵy eki jylda oblysymyzdyń ońtústik aýdandary qýańshylyq pen sý tapshylyǵyn kórip otyr. Bıyl da mundaı jaǵdaı qaıtalanbaýy úshin tájirıbeli mamandarmen, áriptesterimizben aqyldasyp, aýyl sharýashylyǵyna qatysty basty máseleniń sheshimin tabýǵa tyrystyq. Ásirese malǵa qajetti sý tapshylyǵyn sheshý úshin aýdandaǵy eldi mekender mańynda buryn bolǵan sý bógetterin tazalaý, sý arnalaryn qazý isin qolǵa aldyq. Bul bastama nátıjeli boldy dep aıta alamyz. Qazirdiń ózinde barlyq sý qoımalaryna qar sýy mol jınaldy, - deıdi Qaztalov aýdanynyń ákimi Albert Esalıev.
Árıne, sý arnalaryn qazý, qaýyzdardyń tabanyn tazartý, tereńdetý ońaı jumys emes. Oǵan arnaýly joba, tıisti tehnıka kerek. Sondyqtan ótken jyly Kaztalov aýdanynda sý qoımalaryn tazartý, kanaldar qazý, tehnıkalyq sý aıdaý, tehnıkalyq sýmen qamtý jumystarynyń jobasyn jasaýǵa aýdandyq bıýdjetten 66,45 mln teńge qarajat bólingen. Bul bastamany Batys Qazaqstan oblysynyń ákimi Ǵalı Esqalıev ta qoldap, aýdanǵa arnaıy tehnıka alynypty.
Osylaısha aýdandyq kommýnaldyq kásiporny sý jańa ekskovator men býldozer traktorly bolyp qaldy. Buryn aýdan aýmaǵyndaǵy bógetter men arnalardy tazartý úshin tehnıkasy bar mekemelerge tapsyrys berip, biraz qarajat shyǵyndalatyn edi. Endi aýdan eshkimge jalynbaı, sý júıelerin ózi jóndeýge kiristi. Sóıtip, byltyr qara kúzge deıin aýdanǵa qarasty 11 eldimekendegi 12 bóget tazartylyp, 40 shaqyrymǵa jýyq Fýrmanov-Qosoba, Ashysaı-Qarasý arnalary qazyldy. Etken beınet, tógilgen ter esh bolmaı, qazirdiń ózinde sý qoımalary taza sýǵa tolyp turǵanyn qapztalovtyq áriptesim Qaırat Jaqyp qýana habarlap jatyr.
Sý qoımasy tazalanyp, qaýyzy tolǵan eldimekender qatarynda Birik, Qoshankól, Qaraoba aýyldyq okrýgteri bar. Ásirese Qaraoba aýyly turǵyndary biraz jyldan beri mal sýynyń tapshylyǵyn jıyn saıyn kóterip júretin. О́tken kúzde aýyl mańyndaǵy eki bóget te tereńdetilip, tabany arshyldy. Bıyl sol bógetterde qar sýy jınalyp, arnasynan asyp jatyr eken.
- Byltyr Qaraoba aýylyndaǵy bógetterdi tazartý úshin aýdandyq bıýdjetten qomaqty qarajat bólindi. Kúzde qos bógetimiz tazartylyp, tereńdetildi. Mine, der kezinde tazartylǵan bógetterge sý tolyp tur. Aýyl turǵyndary dán rıza. Osy jumysty durys josparlap, júzege asyrǵan barlyq azamattarǵa el atynan alǵys aıtamyn! – deıdi «Aqbota» sharýa qojalyǵynyń jetekshisi, Qaztalov aýdandyq máslıhatynyń depýtaty Qýanysh Ermekov.
Batys Qazaqstan
