«Elorda – 21 kún boıy «qyzyl beldeýde». Sońǵy kúnderi táýligine 400-ge jýyq indetke shaldyǵý jaǵdaıy tirkelip otyr. Balalar men zeınetkerler arasynda ınfeksııa juqtyrý jıiledi. Infeksııalyq stasıonarlardaǵy tósek-oryn júktemesi 65%-ke jetti. PTR-zertteýmen turǵyndardy qamtý úshin qalada 24 zerthana jumys istep jatyr. Olardyń táýliktik qýaty – 12 myńnan astam.
Medısına qyzmetkerleri, tártip saqshylary, muǵalimder, eriktiler men basqa da qala turǵyndary – koronavırýspen kúreste bir jyldan astam ýaqyt boıy aldyńǵy shepte keledi. О́kinishke qaraı, keıbir qala turǵyndary koronavırýsty jeńe almady.
Kún saıyn naýqastar reanımasııaǵa túsip jatyr. Kópshiliginiń densaýlyq jaǵdaıy óte aýyr dep baǵalanyp otyr. Bul vırýsty jeńý ońaı emes. Adamdardyń ómiri men densaýlyǵyna nuqsan keltiretin vırýs.
Barsha turǵynnan saq bolýdy, óz densaýlyǵymyz ben aınaladaǵylarymyzdyń densaýlyǵyna nemquraıdy qaramaýdy suraımyn. Syrtqa shyqqan soń aınalańyzdaǵy adamdarǵa qarańyz. Bireýdiń sanıtarııa normalaryn saqtamaýy basqalardyń densaýlyǵyna, tipti ómirine áser etýi múmkin. Barshańyzdy sanıtarlyq-epıdemıologııa talaptaryn qatań saqtaýǵa shaqyramyn: maska taǵyp, adam kóp jınalatyn oryndarǵa barmaý kerek.
Jyl basynan bastap vaksınasııa bastaldy. Birinshi bolyp vırýspen kúreste aldyńǵy shepte júrgen medısına, polısııa qyzmetkerleri, muǵalimder vaksına aldy. Halyqty vaksınalaý sáýir aıynyń ortasynan bastalady dep josparlap otyrmyz. Ujymdyq ımmýnıtet arqyly ǵana vırýsty jeńýge bolady.
Qazir qalada birqatar qosymsha karantındik shekteýler qabyldandy. Bul koronavırýstyń taralý qaýpin azaıtýǵa, azamattardy qorǵaýǵa múmkindik beredi», dep jazdy elorda ákimi.
