QR Ekologııa, geologııa jáne tabıǵı resýrstar mınıstri Maǵzum Myrzaǵalıev reseılik áriptesterine Jaıyq ózeni boıynsha gıdrologııalyq jyldyq anyqtamalarmen almasýdy usyndy. Bul týraly Orynbor qalasyndaǵy Qazaqstannyń Ekologııa mınıstri men Reseı Federasııasy tabıǵı resýrstar jáne ekologııa mınıstri Aleksandr Kozlovtyń ekijaqty kezdesýinde aıtyldy.
Maǵzum Myrzaǵalıevtiń aıtýynsha Jaıyqtyń tartylýy men osynyń áserinen ózen ekojúıesiniń buzylýy – onyń sý sharýashylyq júıesin keshendi zertteýdi talap etedi. Mınıstr 1981 jylǵa jeıin Jaıyqtyń biryńǵaı gıdrologııalyq jyldyǵy jasalyp, 1982 jyldan bastap QazKSR men RFKSR úshin bólek daıyndala bastaǵanyn atap ótti. Al KSRO taraǵan soń ár el óz aldyna jasaıtyn boldy.
«Dál osyndaı jumys tásili biz qazir kórip otyrǵan saldarǵa ákep soqtyrdy dep esepteımin. Osyǵan baılanysty Jaıyq boıynsha gıdrologııalyq jyldyqtarmen turaqty túrde almasyp otyrý tájirıbesin engizýdi usynamyn», dedi M.Myrzaǵalıev.
Budan bólek Qazaqstannyń Ekologııa mınıstri Jaıyqtyń tómengi jaǵyndaǵy ekojúıeni saqtaý úshin sáýir-mamyr aılarynda Irıklın sý qoımasynan jiberiletin sý kólemin arttyrýdy usyndy.
«Sonymen birge ózen basseınindegi kásiporyndardyń biryńǵaı reestrin jasap, ár kásiporynnyń áseri boıynsha saraptama júrgizý kerek. Sóıtip aınalymdy sýmen qamtamasyz etý júıesin, sý tazalaýdyń tıimdi júıesin jáne aýylsharýashylyǵynda sý únemdeý tehnologııasyn engizý qajet. Atqarylǵan jumys týraly aqparatty Jaıyq transshekaralyq ózeniniń ekojúıesin saqtaý boıynsha Qazaqstan-Reseı komıssııanyń aıasynda qaraýǵa engizýdi usynamyz», dedi qazaqstandyq vedomstvo basshysy.
Budan bólek, Qazaqstan tarapy Batys Qazaqstan oblysy atmosferalyq aýasynyń transshekaralyq lastanýymáselesin de qozǵady.
«Atmosferalyq aýanyń monıtorınginen Reseı Federasııasynyń shekaralyq aýyldarynda kúkirttotyǵy kórsetkishiniń artyp ketý jaǵdaılary baıqaldy. Jergilikti turǵyndar men atqarýshy organdardan gazdyń ıisi boıynsha jıi shaǵym túsedi. Ásirese, ol jel soltústikke qaraı turǵanda qatty baıqalady. Bul ózindik ıistiń kózi – Orynbordaǵy gaz jaǵatyn kenoryndary», dedi Maǵzum Myrzaǵalıev.
Máseleniń sheshimi retinde Qazaqstannyń Ekologııa mınıstri atmosferalyq aýanyń lastaný deńgeıi boıynsha birlesken monıtorıng pen saraptama júrgizýdi, Qazaqstan men Reseı tarapynan avtomattandyrylǵan baqylaý posttaryn ornatýdy, sonymen qatar munaıgaz kompanııalarynyń qyzmetin baqylaýdy kúsheıtýdi usyndy.
Kezdesýde sonymen birge Qazaqstan men Reseıdiń Aımaqaralyq áriptestigi forýmyn ótkizý máselesi talqylandy. Taraptar kórmeniń birlesken tanystyrylymdary boıynsha kelisimdi, qol qoıylýy tıis ekijaqty qujattardy jáne Forýmnyń paneldik sessııasy baǵdarlamasyn aıaqtaý qajettigi týraly ózara kelisimge keldi.
Kezdesý qorytyndysy boıynsha eki eldiń tabıǵat qorǵaý vedomstvolarynyń mınıstrleri Ertis transshekaralyq ózeniniń ekojúıesin qalpyna keltirý jáne saqtaý máselesin tolyqqandy zertteý úshin kelesi kezdesýdi Pavlodar qalasynda ótkizý týraly sheshim qabyldady.
